Arvadına dediyi tək kəlimə başına dərd oldu

Türkiyənin Yargıtay 2-ci Hüquq Dairəsi boşanma işi üzrə mühüm qərar qəbul edib.

Sonxeber.az xarici mediaya istinadla xəbər verir ki, məhkəmə arvadına "eşşəksən, heyvansan" deyərək təhqir edən kişinin daha ağır təqsirli olduğuna qərar verib.

Şiddətli fikir ayrılığı yaşayan ər-arvad qarşılıqlı şəkildə boşanma üçün məhkəməyə müraciət edib. Ailə Məhkəməsi kişinin mütəmadi olaraq spirtli içki qəbul etdiyini, arvadını söydüyünü və təhqir etdiyini nəzərə alaraq onu tam təqsirli sayıb. Lakin qərardan verilən apellyasiya şikayətindən sonra iş yenidən araşdırılıb və tərəflər bərabər təqsirli hesab edilərək qadının təzminat tələbi rədd edilib.

İş Yargıtayın 2-ci Hüquq Dairəsinə çatdıqda isə fərqli qərar verilib. Yargıtay kişinin təhqiramiz davranışlarının davamlı olduğunu, qadının ərinə qarşı zorakılığının isə yalnız bir dəfə baş verdiyini vurğulayıb.

Yüksək məhkəmə tərəflərin bərabər təqsirli sayılmasının düzgün olmadığını, kişinin qadından daha ağır təqsirli olduğunu bildirib və əvvəlki qərarı ləğv edib.

Qərarda qeyd olunub ki, boşanmaya görə zərər çəkən və ya daha az təqsirli tərəf maddi, eləcə də şəxsi hüquqlarına müdaxilə edildiyi halda mənəvi təzminat tələb edə bilər. Bu əsasla məhkəmə qadının sosial və iqtisadi vəziyyəti də nəzərə alınmaqla onun xeyrinə uyğun məbləğdə maddi və mənəvi təzminat ödənilməsinə qərar verilməli olduğunu bildirib.

Telegramda izləyin