Dizlərdə xırtıltı nə vaxt təhlükə siqnalıdır? - Mütəxəssisdən AÇIQLAMA

"Gəzinti və ya əyilmə zamanı dizlərdə yaranan səs və xırtıltılar əksər hallarda sağlamlıq üçün heç bir təhlükə yaratmır".

Oxu.Az "The Mirror" nəşrinə istinadən xəbər verir ki, bunu osteopat (xəstəliklərin diaqnostikası və müalicəsini dərmansız, yalnız əllərin toxunması və xüsusi hərəkətlərlə (manual üsullarla) həyata keçirən mütəxəssis) Fatema Kontraktor bildirib.

"Çox vaxt bu səslər oynaq daxilində yaranan zərərsiz qaz qabarcıqları səbəbindən meydana gəlir", - deyə mütəxəssis izah edib.

Bununla belə, o əlavə edib ki, bəzi hallarda oynaqdakı səslər mütləq tibbi müayinə tələb edir. Bir sıra xarakterik əlamətlər həkimə müraciət etməyin vacibliyini göstərir.

"Əgər dizinizdə ağrı və ya şişkinlik varsa, bu, onurğa və ya qığırdaq toxuması ilə bağlı problemlərin göstəricisi ola bilər və dizin vəziyyətini düzgün qiymətləndirmək lazımdır", - deyə həkim vurğulayıb.

Həkimin sözlərinə görə, güclü və ya uzunmüddətli ağrı sindromu olduqda xəstə ətraflı diaqnostika üçün dərhal osteopat və ya fizioterapevtə müraciət etməlidir.

Dizdəki kənar səslərin səbəblərindən biri oynaq boşluğunda ilişib qala bilən, amortizator rolunu oynayan qığırdaq elementinin - meniskin yırtılmasıdır. Belə travmalar adətən idman məşqləri zamanı və ya uğursuz addım nəticəsində baş verən kəskin fiziki yüklənmələr, məsələn, burulma, qəfil dönmə və ya hərəkət trayektoriyasının sürətlə dəyişməsi səbəbindən yaranır. Həmçinin yaş artdıqca menisk təbii aşınmaya, incəlməyə və dağılmaya məruz qalır.

Xırtıltı və sürtünmə səslərinə səbəb olan digər geniş yayılmış amil diz oynağının osteoartritidir. Bu patologiya sümük strukturlarının birbaşa təmasına gətirib çıxaran qığırdaq toxumasının incəlməsi fonunda inkişaf edir.

Səhiyyə mütəxəssisləri, xüsusən gənclər və aktiv həyat tərzi keçirən şəxslər arasında oynaq xırtıltısının ən çox rast gəlinən səbəblərindən biri kimi diz qapağının yerdəyişməsini də qeyd edirlər.

Tibbi təcrübədə bu vəziyyət diz qapağının disfunksiyası və ya patellofemoral ağrı sindromu (PFAS) kimi təsnif edilir. Bu sindrom hərəkət zamanı diz qapağının yerini dəyişməsi nəticəsində yaranır, sürtünməyə və xarakterik səsə səbəb olur.

Telegramda izləyin