Hansı bel ağrısı xərçəngə işarə edə bilər?

Bel ağrısı çox vaxt yaşla bağlı adi problem kimi qəbul edilir. Lakin 50 yaşdan sonra yaranan yeni, uzunmüddətli və qeyri-adi ağrılar daha diqqətli yanaşma tələb edir.

Lent.az xəbər verir ki, bel ağrısı insanların həyatları boyunca ən azı bir dəfə qarşılaşdığı ən geniş yayılmış problemlərdən biridir. Adətən belə ağrılar yaşla bağlı dəyişikliklər, ağır iş günündən sonra yorğunluq, əzələlərin gərginliyi və ya osteoxondrozla əlaqələndirilir. Ancaq mütəxəssislər xəbərdarlıq edirlər ki, 50 yaşdan sonra başlayan yeni, davamlı və əvvəllər müşahidə edilməyən bel ağrıları bəzi hallarda onkoloji xəstəliklərin əlaməti ola bilər.

Adi görünən simptomun təhlükəsi

"Mirror" Proton Terapiya Mərkəzinin radiasiya onkoloqu doktor Jiri Kubesə istinadla yazır ki, əsas problem bel ağrılarının çox geniş yayılmasıdır. Orta yaşlı milyonlarla insan bu cür narahatlıqla üzləşdiyi üçün həm xəstələr, həm də həkimlər yeni yaranmış ağrını həmişə ciddi xəstəliyin mümkün əlaməti kimi qiymətləndirmirlər. Mütəxəssisin sözlərinə görə, görünən bir səbəb olmadan qəfil başlayan, uzun müddət davam edən və keçməyən ağrı xüsusi diqqət tələb edir. Yaş artdıqca onkoloji xəstəliklərin yaranma riski də yüksəlir. Əvvəllər bel ağrısı yaşamayan bir insanda qəfil davamlı və yorucu ağrının başlaması da müayinə üçün səbəb hesab edilir.

Bel ağrısı hansı xərçəng xəstəlikləri ilə bağlı ola bilər?

Bel ağrısının səbəblərindən biri bəzi xərçəng növlərinin sümük toxumasına metastaz verməsi ola bilər. Xüsusilə süd vəzi, prostat vəzi, ağciyər, böyrək və qalxanabənzər vəz xərçəngləri sümük toxumasına yayıla bilər. Bəzi hallarda məhz onurğa nahiyəsində yaranan ağrı insanı ilk dəfə həkimə müraciət etməyə vadar edən simptom olur. Oxşar əlamətlər çoxsaylı mieloma zamanı da müşahidə edilə bilər. Bu, sümük iliyində yaranan bədxassəli şiş xəstəliyidir. Mütəxəssislər davamlı və səbəbi aydın olmayan bel ağrısı zamanı yalnız ağrıkəsicilərdən və ya isidici məlhəmlərdən istifadə etməklə kifayətlənməməyi tövsiyə edirlər.

Adi bel ağrısını təhlükəli ağrıdan necə ayırmaq olar?

Əzələ və oynaq mənşəli adi bel ağrısı adətən fiziki hərəkətlə əlaqəli olur. Ağrı əyilərkən, bədəni döndərərkən, ağırlıq qaldırarkən və ya ayağa qalxarkən güclənə, istirahətdən sonra isə azala bilər. Doktor Kubesin sözlərinə görə, şişlə əlaqəli ağrı fərqli xüsusiyyət göstərə bilər. Belə ağrı hərəkətdən asılı olmaya və həm fiziki fəaliyyət zamanı, həm də insan tam istirahətdə olarkən davam edə bilər. İnsanı gecə yuxudan oyadacaq qədər güclü olan və reseptsiz satılan adi ağrıkəsicilərlə keçməyən ağrılar da diqqətdən kənarda qalmamalıdır. Ağrının yerləşdiyi nahiyə də əhəmiyyət daşıyır. Belin orta hissəsində yaranan ağrı, aşağı bel nahiyəsindəki ağrılarla müqayisədə mexaniki yüklənmə ilə daha az əlaqəli ola bilər və buna görə əlavə müayinə tələb edə bilər.

Hansı əlamətlər zamanı təcili həkimə müraciət edilməlidir?

Bel ağrısı ilə yanaşı bəzi simptomların yaranması təcili tibbi yardım tələb edə bilər. Ağrı ayaqlarda getdikcə artan zəiflik, keyimə, iynələnmə hissi, yerimə zamanı tarazlığın pozulması, sidiyə və ya nəcisə nəzarətin qəfil itirilməsi ilə müşayiət olunursa, vaxt itirmək olmaz. Onkoloqun sözlərinə görə, bu əlamətlər şişin və ya metastazların onurğa beynini sıxması ilə bağlı ola bilər. Belə vəziyyətdə planlı şəkildə terapevt və ya nevroloq qəbulunu gözləmək düzgün deyil. Həmin gün təcili tibbi yardım almaq vacibdir. Bel ağrısı ilə yanaşı davamlı öskürək, səbəbsiz və kəskin çəki itkisi, nəcis ifrazında dəyişikliklər və ya döş nahiyəsində şübhəli bərkimə və düyünlərin yaranması da əlavə müayinə üçün ciddi səbəb hesab olunur.

Telegramda izləyin