Vahid məktəbli formasının tətbiqinin gündəmə gəlməsini müsbət qiymətləndirirəm - AÇIQLAMA

"Məktəbli formasının təhsildəki rolu və əhəmiyyəti artıq bir müddətdir müzakirə olunur. Bu barədə bir neçə dəfə fikrimi bildirmişəm. Yaxın keçmişə qədər Naxçıvan Muxtar Respublikasında vahid məktəbli geyimi uzun illər tətbiq olunurdu və bu, məktəblərdə şagirdlər arasında sosial bərabərliyin təmin edilməsinə xidmət edirdi. Eyni zamanda, müəllimlər arasında da vahid geyim prinsipi var idi. Bu baxımdan həm şagirdlər, həm də müəllimlər arasında bərabərlik təmin olunur, şagirdlər müəllimlərini vahid geyimdə görərək bunu qəbul edirdilər".

Bunu Sonxeber.az-a açıqlamasında təhsil eksperti Elçin Muradov bildirib.

O, bildirib ki, Bakı və Bakıətrafı ərazilərdə vahid məktəbli formasının tətbiqinin gündəmə gəlməsini müsbət qiymətləndirir:

"Naxçıvanda doğulub-böyümüş və həmin təhsil sistemində təhsil almış biri kimi bunun müsbət təsirlərini görmüşəm. Hesab edirəm ki, vahid məktəbli formasının burada da tətbiqi şagirdlər arasında intizamın formalaşmasına müsbət təsir göstərə bilər. Hər bir şeyin əsasında intizam və mədəniyyət dayanır. Geyim, danışıq tərzi, təlim və tədris də bu baxımdan müəyyən rol oynayır. Düşünürəm ki, hər bir şagird vahid məktəbli geyimində olduqda özünü daha yaxşı toparlamağı, qarşısındakının müəllim olduğunu dərk etməyi və ona uyğun davranmağı daha yaxşı qavraya bilər. Bu da istər-istəməz onun daha intizamlı və tədbirli davranmasına, nəticə etibarilə təhsilin keyfiyyətinə müsbət təsir göstərə bilər. Kim nə qədər desə də ki, məktəbli formasının təhsildə əhəmiyyəti yoxdur, mən düşünürəm ki, var. Çünki hər şey birinci növbədə mədəniyyətdən, intizamdan və nizam-intizamdan başlayır".

Röyalə Xəyal

Telegramda izləyin