Vergi yükündə dəyişiklik: Vətəndaşların ailə büdcəsinə necə təsir edəcək?

2027-ci ildən gəlir vergisi dərəcələrində dəyişikliklərin tətbiqi müxtəlif gəlir qruplarına aid vətəndaşların əldə etdiyi real gəlirə və ailə büdcəsinə təsir göstərə bilər. Vergi yükündə baş verəcək dəyişikliklərin xüsusilə aşağı və orta gəlirli şəxslərin gündəlik xərclərinə, sosial vəziyyətinə və yaşayış imkanlarına necə təsir edəcəyi diqqət çəkən məsələlərdəndir. Eyni zamanda, bu dəyişikliklərin cəmiyyətdə gəlir bölgüsünə və sosial rifaha təsiri də müzakirə olunur.

Bəs, 2027-ci ildən gəlir vergisi dərəcələrinin dəyişməsi müxtəlif gəlir qruplarına aid vətəndaşların sosial vəziyyətinə və gündəlik həyatına necə təsir göstərə bilər və bu dəyişikliklər gəlir bərabərliyi və sosial rifah baxımından hansı nəticələr yarada bilər?
Mövzu ilə bağlı Sonxeber.az-a açıqlama verən Milli Məclisin deputatı Fazil Mustafa bildirib ki, bunu indidən dəqiq söyləmək çətindir. Bu məsələ, ilk növbədə, rəqabət mühitinin necə işləməsindən asılıdır:

"İnsanların gəlirlərini müəyyən edən əsas amillərdən biri rəqabət mühitidir. Bu sistem effektiv işləsə, tamamilə fərqli vəziyyət yarana bilər. Hər halda, bu məsələ ətrafında düşünmək və gələcək təsirləri daha dəqiq müəyyənləşdirmək lazımdır. Hesab edirəm ki, gəlir qrupları arasındakı fərqin və sosial vəziyyətin gələcəkdə necə dəyişə biləcəyini obyektiv statistik məlumatlar əsasında qiymətləndirmək mümkündür. Burada ilk növbədə vətəndaşın rifahı məsələsi üzərində düşünməliyik. Rifah yalnız maddi təminat deyil, eyni zamanda insanın mənəvi tələblərinin həyata keçirilməsi və bunun üçün müvafiq mühitin yaradılmasıdır. Bu istiqamətdə də müəyyən işlərin görülməsi vacibdir".

Röyalə Xəyal

Telegramda izləyin