"Azərbaycanla Mərkəzi Asiya arasında əməkdaşlığın əsas istiqamətlərindən biri Xəzər üzərindən əməkdaşlıqdır" - Könül Nurullayeva

"Prezident İlham Əliyevin Türkmənistana işgüzar səfəri, Türkmənbaşı şəhərində keçirilən Azərbaycan və Mərkəzi Asiya Dövlət Başçılarının 8-ci Məşvərət görüşündə iştirakı əlaqələrin yüksək səviyyədə inkişafını göstərir. Bakı-Aşqabad münasibətlərinin son dövrdə sürətlə intensivləşməsi təsadüfi deyil. Ötən dövrdə iki ölkə arasında yüksək səviyyəli təmasların sayı artıb, siyasi dialoqla yanaşı iqtisadi, enerji, nəqliyyat və humanitar əməkdaşlıq istiqamətləri də genişlənib". Bu sözləri Sonxeber.az-a açıqlamasında millət vəkili Könül Nurullayeva bildirib.
Onun sözlərinə görə, məlum olduğu kimi, cari ilin iyunun 22-də Türkmənistan Prezidenti Sərdar Berdiməhəmmədovun Azərbaycana dövlət səfəri zamanı geniş əməkdaşlıq gündəliyi müzakirə edilmiş, bir sıra sənədlər imzalanmışdı: "Bu gün isə Prezient İlham Əliyevin Türkmənistana işgüzar səfəri çərçivəsində keçirilən görüşlər Azərbaycanın Mərkəzi Asiya siyasətinin daha geniş regional strategiyaya çevrildiyini göstərir. Yeri gəlmişkən, Azərbaycanın Mərkəzi Asiya Dövlət Başçılarının Məşvərət formatına tamhüquqlu üzv kimi qoşulması 2025-ci ildə qəbul edilmiş mühüm siyasi qərarlardan biri idi. Digər Mərkəzi Asiya ölkələri kimi, Türkmənistan da bu qərarın qəbulunda fəal dəstək göstərən ölkələrdən olub. Bu baxımdan Azərbaycanın tamhüquqlu üzv kimi Türkmənbaşıda keçirilən 8-ci Məşvərət görüşündə iştirakı xüsusi əhəmiyyət daşıyır. Görüşdə Azərbaycanla yanaşı Qazaxıstan, Qırğızıstan, Tacikistan, Türkmənistan və Özbəkistan prezidentlərinin iştirakı ilə sənədlər imzalandı. Tərəflər "Azərbaycan Respublikası və Mərkəzi Asiya Dövlət Başçılarının 8-ci Məşvərət görüşünün Birgə Bəyanatı"nı və Məşvərət görüşünün tənzimləyici sənədlərinə dair qərarı qəbul ediblər.

Azərbaycanla Mərkəzi Asiya arasında əməkdaşlığın əsas istiqamətlərindən biri Xəzər üzərindən əməkdaşlıqdır. Azərbaycanla bəzi Mərkəzi Asiya ölkələri Xəzəryanı dövlət kimi Avropa ilə Asiya arasında mühüm bağlantı imkanlarına malikdirlər. Bu baxımdan Azərbaycan-Türkmənistan münasibətlərində nəqliyyat və enerji məsələləri xüsusi əhəmiyyət kəsb edir. Türkmənistan rəhbərliyi də Azərbaycanla görüşlərdə Transxəzər nəqliyyat marşrutlarının, Xəzər və Qara dəniz regionlarını birləşdirən dəhlizlərin inkişafını prioritet istiqamət kimi qeyd edib.

Azərbaycan üçün isə Mərkəzi Asiya ilə əlaqələrin gücləndirilməsi ölkənin Şərq-Qərb və Şimal-Cənub nəqliyyat bağlantılarındakı rolunu daha da möhkəmləndirir. Bakı-Tbilisi-Qars dəmir yolu, Ələt Beynəlxalq Dəniz Ticarət Limanı və Transxəzər marşrutu kimi layihələr Azərbaycanı Mərkəzi Asiyanın dünya bazarlarına çıxışında mühüm tranzit tərəfdaşlardan birinə çevirir.

Azərbaycan və Türkmənistanın enerji potensialı da ikitərəfli münasibətlərin strateji xarakterini müəyyən edən əsas amillərdəndir. Hər iki ölkənin Xəzər regionunda yerləşməsi enerji resurslarının istehsalı ilə yanaşı onların dünya bazarlarına çatdırılması məsələsini də ön plana çıxarır. Bu kontekstdə enerji sahəsində əməkdaşlıq haqqında sazişin imzalanması da təsdüfi deyil".

Müəllif: İlkin Məmmədkərimov

Telegramda izləyin