Son istifadə tarixinə 2-3 ay qalan məhsulları almaq olarmı? - QİDA EKSPERTİNDƏN AÇIQLAMA

Supermarketlərdə alıcıların diqqətini cəlb edən endirimlər arasında son istifadə tarixinə iki-üç ay qalmış ərzaq məhsulları da var. Qiymətlərin aşağı salınması istehlakçılara daha sərfəli alış-veriş imkanı yaratsa da, belə məhsulların keyfiyyəti və təhlükəsizliyi ilə bağlı suallar ortaya çıxır. Xüsusilə süd məhsulları, konservlər, şirniyyatlar və digər ərzaqların endirimlə satılması alıcıları seçim qarşısında qoyur.

Bəs son istifadə tarixinə bir neçə ay qalmış məhsulları almaq sağlamlıq baxımından nə dərəcədə təhlükəsizdir? Məhsulun üzərindəki tarix onun keyfiyyətinə tam zəmanət verirmi? Endirimdə olan ərzaqları alarkən istehlakçılar nələrə diqqət etməlidirlər?
Mövzu ilə bağlı qida eksperti Fərid Səfərov Sonxeber.az-a açıqlamasında bildirdi ki, supermarketlərdə son istifadə tarixinə iki-üç ay qalmış məhsulların endirimlə satılması özlüyündə həmin məhsulların təhlükəli olması demək deyil. Əgər məhsulun son istifadə tarixi keçməyibsə, qablaşdırması bütövdürsə və tələb olunan saxlanma şəraitinə əməl olunubsa, belə məhsulları almaq, bir qayda olaraq, təhlükəsizdir. Onun sözlərinə görə, endirim çox vaxt məhsulun satış müddətinin sona yaxınlaşması və mağazanın ehtiyatları vaxtında satmaq istəyi ilə bağlı olur: "Lakin burada əsas məsələ məhsulun üzərindəki tarixlə yanaşı, onun növü və saxlanma şəraitidir. Məsələn, konservlər, makaron, düyü və digər quru məhsullar düzgün saxlanıldıqda uzun müddət keyfiyyətini qoruya bilər. Süd məhsulları, ət, balıq və soyuducuda saxlanmalı olan digər tez xarab olan qidalarda isə temperatur rejiminə xüsusi diqqət yetirilməlidir. Soyuq zəncir pozulubsa, məhsulun son istifadə tarixi keçməsə belə, təhlükə yarana bilər.

İstehlakçılar alış zamanı qablaşdırmanın zədələnməməsinə, şişməməsinə, sızma və digər dəyişikliklərin olmamasına, məhsulun düzgün temperaturda saxlanmasına diqqət etməlidirlər. Həmçinin "son istifadə tarixi" ilə "minimum yararlılıq tarixi" anlayışlarını fərqləndirmək vacibdir. Birinci göstərici xüsusilə tez xarab olan qidalar üçün təhlükəsizlik baxımından əhəmiyyətlidir. Minimum yararlılıq tarixi isə əsasən məhsulun keyfiyyət xüsusiyyətlərinin qorunması ilə əlaqədardır.

Endirimli məhsulu alarkən onun evdə nə qədər müddətə istifadə ediləcəyini də nəzərə almaq lazımdır. Məhsulu son tarixə qədər istehlak etmək mümkün deyilsə, yalnız ucuz olduğuna görə almaq məqsədəuyğun deyil. Son istifadə tarixi keçmiş məhsulları isə endirimlə satılması və ya görünüşünün normal olması səbəbindən təhlükəsiz hesab etmək olmaz.

Nəticə etibarilə, endirimli məhsul almaqdan çəkinmək lazım deyil. Əsas məsələ qiymətə deyil, məhsulun yararlılıq tarixinə, saxlanma şəraitinə, qablaşdırmasına və qida təhlükəsizliyi tələblərinə diqqət yetirməkdir.

Sağlam qidalanaraq sağlam yaşayın!".

Müəllif: İlkin Məmmədkərimov

Telegramda izləyin