"Azərbaycan və Türkiyə kimi strateji müttəfiqlər bir-birinin qərarlarına eyni həssaslıqla yanaşmalıdırlar" - BƏHRUZ QULİYEV

"Prezident İlham Əliyevin oktyabrın 30-da Bakıda keçiriləcək FIFA U-15 Dünya Çempionatı və Festivalının finalçılarını mükafatlandırması ilə əlaqədar Türk Dövlətləri Təşkilatının Zirvə görüşündə Azərbaycanı xarici işlər naziri Ceyhun Bayramovun təmsil etməsi qərarını diplomatik təcrübə və qarşılıqlılıq prinsipi baxımından qiymətləndirmək lazımdır.

Xatırladım ki, 2024-cü ildə Şuşada keçirilən TDT-nin qeyri-rəsmi Zirvə görüşündə Türkiyə Prezidenti Rəcəb Tayyib Ərdoğan iştirak etməmiş, ölkəsini vitse-prezident Cövdət Yılmaz təmsil etmişdi. 2026-cı ildə Bakıda keçirilən beynəlxalq tədbirlərdə də Türkiyə Prezidentini ayrı-ayrı hallarda hökumət üzvləri təmsil ediblər.

Əlbəttə, hər bir dövlət başçısının öz iş qrafiki və rəsmi öhdəlikləri var. Buna görə də belə qərarları avtomatik olaraq siyasi münasibətlərin göstəricisi kimi qiymətləndirmək düzgün deyil. Əsas məsələ ölkənin beynəlxalq tədbirdə təmsil olunması və əməkdaşlığın davam etdirilməsidir." Bu fikirləri Səs qəzetinin baş redaktoru, siyasi ekspert Bəhruz Quliyev Sonxeber.az-a açıqlamasında deyib.
Ekspert qeyd edib ki, bir məqam da var, diplomatiyada qarşılıqlı hörmət və anlayış birtərəfli deyil, qarşılıqlı olmalıdır. Azərbaycan və Türkiyə kimi strateji müttəfiqlər bir-birinin qərarlarına eyni həssaslıqla yanaşmalıdırlar.

Azərbaycan Türk Dövlətləri Təşkilatının qurucu üzvlərindən biridir və Türk dünyasının birliyinin möhkəmləndirilməsinə mühüm töhfə verir. Ona görə də ayrı-ayrı tədbirlərdə təmsilçilik səviyyəsindən daha vacib olan məsələ ortaq maraqların qorunması və strateji əməkdaşlığın davamlı inkişafıdır.

"İnanıram ki, Azərbaycan-Türkiyə münasibətləri qarşılıqlı hörmət, bərabər yanaşma və ortaq maraqlar əsasında bundan sonra da möhkəmlənəcək." - deyə, B.Quliyev əlavə edib.

Müəllif: İlkin Məmmədkərimov

Telegramda izləyin