G20 ölkələrinin xarici işlər nazirləri ABŞ-də toplaşıb - Qlobal iqtisadiyyat və təhlükəsizlik müzakirə olunur

Dünyanın aparıcı iqtisadiyyatlarını birləşdirən G20 ölkələrinin xarici işlər nazirləri ABŞ-nin Corciya ştatının Atlanta şəhərində iki günlük görüşə başlayıblar. Oktyabrın 30-31-də keçirilən toplantıda qlobal iqtisadiyyat, enerji təhlükəsizliyi, beynəlxalq ticarət və təchizat zəncirlərinin dayanıqlılığı əsas müzakirə mövzuları sırasındadır.

Reuters agentliyinin məlumatına görə, görüşə ABŞ dövlət katibi Marko Rubio ev sahibliyi edir. Vaşinqton builki G20 sədrliyi çərçivəsində ölkələr arasında iqtisadi əməkdaşlığın genişləndirilməsinə və kritik xammalın tədarükündə alternativ imkanların yaradılmasına xüsusi diqqət ayırır.

Görüşdə hansı məsələlər müzakirə olunur?

Sonxeber.az Reuters-ə istinadən xəbər verir ki, toplantının əsas istiqamətlərindən biri enerji təhlükəsizliyidir. Xüsusilə neft, mayeləşdirilmiş təbii qaz, gübrə və sənaye istehsalı üçün zəruri xammalın beynəlxalq bazarlara fasiləsiz çatdırılması məsələsi diqqət mərkəzindədir.

ABŞ Çin bazarından asılılığın azaldılması və nadir torpaq elementləri də daxil olmaqla kritik mineralların tədarükündə əməkdaşlığın gücləndirilməsini də gündəmə gətirir.

Bundan başqa, dəniz nəqliyyatının təhlükəsizliyi, beynəlxalq ticarətdə maneələr və geosiyasi gərginliklərin dünya iqtisadiyyatına təsirləri müzakirə edilir.

Rusiya və Çin nümayəndələrinin iştirakı diqqət çəkir

Görüşün diqqətçəkən məqamlarından biri Rusiya xarici işlər naziri Sergey Lavrovun da toplantıda iştirak etməsidir. Bu, Qərb ölkələri arasında diplomatik müzakirələrə səbəb olub.

Bəzi Avropa nümayəndələrinin Lavrovla birlikdə ənənəvi qrup fotosunda iştirak etmək istəmədiyi bildirilir. Hətta iki ayrı qrup fotosunun çəkilməsi variantı müzakirə olunur.

Çini isə xarici işlər naziri Van İ deyil, xarici işlər nazirinin müavini Ma Çjaosü təmsil edir. Cənubi Afrika Respublikasının toplantıya dəvət edilməməsi də müzakirələrə səbəb olan məsələlərdəndir.

Növbəti sammit dekabrda keçiriləcək

Atlanta görüşü dekabrın 14-15-də Mayamidə keçirilməsi planlaşdırılan G20 liderlər sammitinə hazırlıq baxımından əhəmiyyət daşıyır. Həmin sammitə ABŞ Prezidenti Donald Tramp ev sahibliyi edəcək.

Atlanta toplantısında iştirakçı ölkələrin ümumi mövqedə razılaşması çətin görünür. Bununla belə, iqtisadi əməkdaşlıq, enerji təhlükəsizliyi və təchizat zəncirləri üzrə ayrı-ayrı razılaşmaların əldə olunması gözlənilir.

Müəllif: İlkin Məmmədkərimov

Telegramda izləyin