İtaliya Ukraynaya yeni hərbi yardım paketi hazırlayır: İlk dəfə 2026-cı ildə silah göndəriləcək

İtaliya Ukraynaya hərbi dəstəyini davam etdirmək üçün yeni yardım paketi hazırlayır. Bu, 2026-cı ildə Romanın Kiyevə təqdim etməyi planlaşdırdığı ilk hərbi yardım paketi olacaq.

Reuters-in məlumatına görə, İtaliyanın müdafiə naziri Quido Krozetto noyabrın 10-da ölkə parlamentinin Kəşfiyyat və Təhlükəsizlik Komitəsinə yeni yardım paketi barədə məlumat verəcək. Paketin məzmunu məxfi saxlanılsa da, Ukraynanın hava hücumundan müdafiə sistemləri üçün nəzərdə tutulan Aster tipli raketlərin göndərilməsi ehtimalı var.

Söhbət Fransa və İtaliyanın birgə istehsal etdiyi SAMP/T hava hücumundan müdafiə sistemlərində istifadə olunan raketlərdən gedir. Bu sistemlər Ukraynanın Rusiya tərəfindən həyata keçirilən raket və pilotsuz uçuş aparatları hücumlarından qorunması baxımından əhəmiyyətlidir.

Yeni yardım paketinin təqdim edilməsi hələ yekun qərar deyil. Bunun üçün müvafiq təsdiq prosedurları həyata keçirilməlidir.

Sonxeber.az Reuters-ə istinadən xəbər verir ki, baş nazir Corcia Meloni, xarici işlər naziri Antonio Tayani və müdafiə naziri Krozetto Ukraynaya hərbi dəstəyin davam etdirilməsini dəstəkləyirlər. Lakin baş nazirin müavini Matteo Salvini və onun təmsil etdiyi Liqa Partiyası yeni silah tədarükünə qarşı çıxır.

İtaliyanın Ukraynaya hərbi yardım göstərmək üçün mövcud icazəsi 2026-cı il dekabrın 31-dək qüvvədədir. Bu müddətin 2027-ci ilə qədər uzadılması isə hələ də qeyri-müəyyəndir.

Məsələnin gələn il keçiriləcək parlament seçkiləri ərəfəsində İtaliya siyasətində daha ciddi mübahisələrə səbəb olacağı gözlənilir.

Müəllif: İlkin Məmmədkərimov

Telegramda izləyin