Mavi balinadan daha uzun: Hind okeanında qeyri-adi nəhəng aşkar edildi

Hind okeanının dibində uzunluğu 120 metrə çata bilən qeyri-adi dəniz canlısı aşkarlanıb. Alimlərin fikrincə, bu canlı planetdə indiyədək qeydə alınmış ən uzun heyvan ola bilər.

Qaynarinfo xəbər verir ki, bu barədə "Kertvar" portalı məlumat yayıb.

Söhbət sifonofor adlanan dəniz canlısından gedir. İlk baxışdan vahid orqanizm təsiri bağışlasa da, əslində bu, minlərlə kiçik fərddən ibarət koloniyadır.

Nəhəng canlı 2020-ci ilin yazında Avstraliyanın qərb sahillərində, Ninqalu sualtı kanyonları ərazisində aparılan elmi ekspedisiya zamanı qeydə alınıb. Şmidt Okeanologiya İnstitutuna məxsus "R/V Falkor" tədqiqat gəmisi həmin ərazidə bir ay davam edən araşdırmalar aparıb.

Ekspedisiya çərçivəsində "SuBastian" adlı uzaqdan idarə olunan sualtı robot 20 dəfə suya endirilib və 4 500 metr dərinliyədək tədqiqat aparıb. Robot ümumilikdə 181 saat dəniz dibinin yaxınlığında fəaliyyət göstərib.

2020-ci il aprelin 6-da alimlər sifonoforun görüntülərini ictimaiyyətə təqdim ediblər. "Apolemia" cinsinə aid olan canlı nəhəng, yastı spiral formasında bükülmüş vəziyyətdə olub. Tədqiqatçılar onun görünüşünü spiralvari uçan naməlum obyektə bənzədiblər.

Robotun operatorları spiralın xarici halqasının diametrini təxminən 15 metr, uzunluğunu isə 47 metr qiymətləndiriblər. Canlının ümumi uzunluğu rəsmi şəkildə ölçülməsə də, institut nümayəndəsinin sözlərinə görə, bu göstərici 120 metrə yaxın ola bilər.

Müqayisə üçün qeyd edək ki, dünyanın ən böyük heyvanı hesab edilən mavi balinanın uzunluğu təxminən 30 metrdir. Beləliklə, aşkarlanan sifonoforun spiralının xarici halqası belə mavi balinanın uzunluğunu xeyli üstələyir. Bununla belə, sifonoforun kütləsi balinanın çəkisi ilə müqayisə edilə bilməz.

Sifonofor necə canlıdır?

Sifonoforlar meduzalar və mərcanlarla qohum olan dəniz orqanizmləridir. Onların əsas xüsusiyyəti bir-biri ilə sıx əlaqədə yaşayan çoxsaylı kiçik fərdlərdən - zoyidlərdən təşkil olunmalarıdır.

Koloniyadakı hər bir fərd müəyyən funksiyanı yerinə yetirir: bəziləri hərəkətə, digərləri qidalanmaya, ovun zəhərlənərək tutulmasına və ya çoxalmaya cavabdehdir. Bu kiçik fərdlər vahid sistem kimi fəaliyyət göstərərək bütöv bir canlı təəssüratı yaradır.

Sifonoforların ən tanınmış nümayəndələrindən biri Portuqaliya gəmiciyidir. Görünüşünə görə çox vaxt meduza ilə qarışdırılan bu canlı da əslində koloniyadır və zəhərli bığcıqları vasitəsilə ovunu tutur.

Alimlər spiral formasının sifonoforun qidalanması ilə əlaqəli olduğunu bildirirlər. Onun bığcıqları kiçik xərçəngkimiləri, balıqları və hətta digər sifonoforları tutmağa imkan verir.

Ekspedisiya zamanı tədqiqatçılar Qərbi Avstraliya sahillərində 30-dək yeni növ aşkarlamış ola biləcəklərini də ehtimal edirlər. Tapıntılar arasında ilk dəfə müşahidə edilən kalmar növü, şüşə süngər koloniyaları və nəhəng hidralar da var.

Telegramda izləyin