ABŞ və Çin Sİ bağlı insidentlər barədə xəbərdarlıq üçün birbaşa əlaqə kanalı yaradır

ABŞ və Çin süni intellekt (Sİ) texnologiyaları sahəsində baş verə biləcək insidentlər barədə operativ məlumat mübadiləsi aparmaq üçün birbaşa əlaqə kanalı yaradır.
Bizimyol.info xəbər verir ki, bu barədə ABŞ-ın maliyyə naziri Skott Bessent noyabrın 10-da bəyan edib.

"ABŞ Prezidenti Donald Trampın tapşırığı ilə Çinlə superintellekt üzrə yeni dialoqun qurulması istiqamətində mühüm işə başlamışıq. Bu dialoqun məqsədi ümumi risklərdən qorunmaq və sistemlərimiz arasında anlaşılmazlıqların qarşısını almaqdır. Qabaqcıl modellərin istifadəyə verilməzdən əvvəl qiymətləndirilməsi və sınaqdan keçirilməsi sahəsində ən yaxşı təcrübələri bölüşməyi, eləcə də bu texnologiyanın idarə olunmasında insan mühakiməsinin əsas rolunu qoruyub saxlamağı nəzərdə tuturuq. Nəhayət, hər bir ölkənin superintellekt modelləri ilə bağlı ciddi insidentlər barədə digər tərəfi operativ şəkildə məlumatlandıra bilməsi üçün birbaşa əlaqə kanalı yaradırıq", - deyə Bessent ABŞ-Çin Münasibətləri üzrə Milli Komitədə çıxışı zamanı bildirib.

Nazirin sözlərinə görə, süni intellekt texnologiyaları inkişaf etdikcə rəqabəti məsuliyyətli idarəetmə ilə uzlaşdırmağın yollarını tapmağa ehtiyac da artacaq.

"ABŞ və Çin arasındakı fərqlərlə bağlı heç bir illüziyaya qapılmamalıyıq. Daha əvvəl də qeyd etdiyim kimi, maraqlarımız hər zaman üst-üstə düşməyəcək. Eyni şəkildə, problemlərin həllinə yanaşmalarımız da həmişə oxşar olmayacaq", - deyə ABŞ maliyyə naziri vurğulayıb.

Sentyabrın sonunda Çin Xarici İşlər Nazirliyinin rəsmi nümayəndəsi Quo Ciaqkun Pekin və Vaşinqtonun süni intellekt texnologiyaları ilə bağlı hökumətlərarası dialoqu bərabərhüquqlu əsasda inkişaf etdirəcəyini bildirmişdi. O, Çinin süni intellektin qlobal idarə olunması məsələlərində hər zaman konstruktiv və məsuliyyətli mövqe tutduğunu qeyd etmişdi.

Telegramda izləyin