Vəfat edən qalmaqallı deputat Astan Şahverdiyev kimdir?

Milli Məclisin Cəbrayıldan seçilən deputatı Astan Şahverdiyev ara-sıra mətbuata verdiyi açıqlamaları ilə qalmaqallara səbəb olur.

Bundan əvvəl Rusiyada işləyən azərbaycanlıları "otxod" adlandırmaqla ölkədə böyük əks-səda doğuran deputat yenidən mətbuatın və sosial şəbəkə istifadəçilərinin tənqid hədəfinə tuş gəlib. Buna səbəb onun avqustun 3-də Bakıda iki nəfərin ölümü, iki nəfərin ağır yaralanması ilə nəticələnən qəzada baş nazirin müavini Əli Həsənovun nəvəsi Nail Allahverdiyevi müdafiə etməsidir.

Vəziyyət artıq həddə çatıb ki, Şahverdiyevin sərgilədiyi mövqe, səsləndirdiyi fikirlər onun deputat həmkarlarını da qəzəbləndirib.

Milli Məclisin İntizam komissiyasının sədri Ağacan Abıyev bildirib ki, həmkarı Astan Şahverdiyevin deputat mandatı əlindən alına bilər.

"İntizam Komissiyası onu deputatlıq mandatından məhrum edə bilər. Komissiya bu məsələyə baxdıqdan sonra görsə ki, Astan Şahverdiyevin bu çıxışı heç bir çərçivəyə sığmır, sözsüz ki, Astan Şahverdiyev deputat mandatını itirəcək" - A.Abıyev açıqlamasında deyib.

Sosial şəbəkələrdə də Şahverdiyevin deputat mandatından məhrum edilməsi təklif olunur.

Qalmaqallara səbəb olan Astan Şahverdiyev kimdir? O, indiyədək hansı fəaliyyətlə məşğul olub?

-Şahverdiyev Astan Nüşrəvan oğlu 15 fevral 1947-ci ildə Fizuli şəhərində anadan olub. 1964-cü ildə Cəbrayıl rayonunun Böyük Mərcanlı kənd orta məktəbini bitirib. Həmin ildə Azərbaycan Neft və Kimya İnstitutuna qəbul olub və 1970-ci ildə İnstitutu bitirib. 1972-1974-cü illərdə hərbi xidmətdə olub. 1978-ci ildə Azərbaycan Texniki Universitetinin aspiranturasına daxil olub və 1981-ci ildə İstilik fizikası üzrə namizədlik dissertasiyası müdafiə edib. 1982-ci ildə müsabiqə yolu ilə Azərbaycan Texniki Universitetinin "İstilik texnikası və istilik qurğuları" kafedrasına assistent vəzifəsinə seçilib.

Şahverdiyev elmi fəaliyyətimi davam etdirərək 1992-ci ildə Moskva Energetika İnstitutunda doktorluq dissertasiyası müdafiə edib, texnika elmləri doktoru alimlik dərəcəsi və 1994-cü ildə professor elmi adı alıb. 1995-ci ildə Nyu-York elmlər akademiyasının həqiqi üzvü seçilib.

2001-ci ildə Azərbaycan Texniki Universitetinin "İstilik və soyuqluq texnikası" kafedrasının müdiri vəzifəsinə seçilib. Dünyanın aparıcı jurnallarında ingilis, türk və rus dillərində çap olunmuş 300-dən çox elmi əsərin, o cümlədən Moskva və Londonda çap olunmuş 5 monoqrafiyanın, 2 ixtiranın, 10 dərslik və dərs vəsaitinin müəllifidir. Elmi rəhbərli altında 9 namizədlik və 3 doktorluq dissertasiyası müdafiə olunub.

1998-ci ildən 2003-cü ilə kimi Birləşmiş Millətlər Təşkilatının Ətraf Mühit və İnkişaf Proqramının Azərbaycan ofisində koordinator vəzifəsində işləyib. 2004-cü ildən UNESCО-nun EURONETRES bərpa olunan enerji resursları üzrə işçi qrupun və idarəedici Komitənin üzvüdür. Avropa ölkələri universitetləri üçün nəzərdə tutulan "Günəş enerjisi" dərsliyinin müəlliflərindən biridir.

ABŞ, Kanada, Hindistan, Misir, İsveçrə, Almaniya, İngiltərə, İtaliya, Şotlandiya, Portuqaliya, Çin, Rusiya, Türkiyə, Slovakiya, Yunanıstan, Özbəkistan, Belarus, Ukrayna, Fransa və s. ölkələrdə keçirilən Beynəlxalq konfrans, simpozium və assambleyalarda məruzələrlə çıxış edib.

Azərbaycan Texniki Universitetinin nəzdində fəaliyyət göstərən Doktorluq Müdafiə Şurasının sədr müavini və bir neçə il Azərbaycan Respublikası Prezidenti yanında Ali Attestasiya Komissiyasının Ekspert Şurasının üzvü olub.

Elm sahəsində Z. Tağıyev adına mükafatın laureatıdır. İngilis və rus dillərini bilir.

2003-cü ildən Yeni Azərbaycan Partiyasının üzvü, 2005-ci ildən isə Milli Məclisin deputatıdır.

Evlidir. 2 övladı var.

Qeyd edək ki, A. Şahverdiyev bu gün səhər saatlarında Qusar rayonunda dünyasını dəyişib.

Telegramda izləyin