Bakı Olimpiya Stadionunda nə qədər toy keçirilib? - AÇIQLAMA

"Bakı Olimpiya Stadionu hazırda futbol üzrə Azərbaycan millisinin UEFA Millətlər Liqasında və "Qarabağ" futbol klubunun UEFA Kubokundakı oyunlarına hazırlaşır. Toy məsələsini müzakirə etməyə ehtiyac görmürəm, çünki bu, aktual mövzu deyil. Stadionun işi yalnız sözügedən tədbirlərlə bağlıdır". Bunu Sonxeber.az-a Bakı Olimpiya Stadionunun (BOS) PR, Media və Tədbirlər departamentinin rəhbəri Cəmilə Mehdiyeva deyib.

C. Mehdiyevanın sözlərinə görə, BOS-un digər çoxlu layihələri var: "Hazırda bütün diqqətimizi onlara yönəltmişik. Biz 15-dən çox növdə xidmət göstəririk . Onlardan biri də stadionda toy şənliklərinin keçirilməsi xidmətidir. Təbii ki, stadionumuzun cədvəlində əgər boş vaxt olsa və müvafiq müraciət qəbul edilsə, biz yox deməyəcəyik. Biz hazırda başqa layihələr üzərində işləyirik. Stadionda toyların keçirilməsi qeyri-trend mövzu olduğuna görə bu barədə məlumat verməyi xoşlamırıq".

İndiyədək BOS-da nə qədər toy şənliyinin keçirilməsinə gəlincə, həmsöhbətim həmin sayı açıqlamaqdan imtina edib: "Bu məlumatı mən açıqlamayacağam. Stadionda ildə 200-dən çox tədbir - konfranslar, korporativ tədbirlər, futbol oyunları və məşqləri və digər tədbirlər keçirilir. Yenə dediyim kimi toy mövzusu qeyri-aktual mövzudur".

Məftun Salmanov

Telegramda izləyin