Bəzi universitetlər Bakıdan kənara köçürülə bilər - AÇIQLAMA

Bu gün müzakirə olunan məsələlərdən biri də Bakıda insan sıxlığının aradan qaldırılması üçün pandemiyadan sonra bir sıra universitetlərin və dövlət qurumlarının Bakıdan kənar bölgələrə köçürülməsidir. Çünki bütün təhsil ocaqları, iri müəssisələr paytaxt Bakıda yerləşir. Məhz buna görə də bölgələrdəki gənclərin bir çoxu təhsil almaq üçün Bakıdakı ali məktəbləri seçirlər. Bu da, təbii ki, Bakıda əhali sıxlığına gətirib çıxarır. Pandemiyadan sonra Bakı Dövlət Universitetindən başqa digər ali məktəblər Bakıdan kənar ərazilərə və rayonlara köçürülə bilərmi?

Bununla bağlı Sonxeber.az-a danışan deputat Ceyhun Məmmədov bildirib ki, bu məsələ Azərbaycan cəmiyyətində müzakirə olunur:

"Universitetlərin bölgələrə köçürülməsi məsələsi təklif olunur və bu, müxtəlif fikirlərlə əsaslandırılır. Bu məsələ, düşünürəm ki, ciddi araşdırılmalı və müzakirə olunmalıdır. Çünki bəzi rayonlarda universitetlər mövcuddur: Sumqayıt, Mingəçevir, Lənkəran və s. Vəziyyət ciddi analiz olunduqdan sonra bəzi universitetlərin bölgələrə köçürülməsi məsələsinə baxıla bilər. Amma bu məsələ ciddi öyrənilməlidir. Burada əsas məsələ Bakıdakı əhali sıxlığının azaldılmasıdır. Ancaq biz nəzərə almalıyıq ki, ümumi prosesə nə təsir göstərə bilər? Məsələn, o şəhərdə ki, sənaye, texnologiya güclüdür və istehsal sahələri var, həmin bölgələrə istehsalatla bağlı, mühəndislik və texniki yönümlü fakültələri olan universitetlər köçürülə bilər. Sumqayıtda böyük Sumqayıt Texnologiyalar Parkı var. Burada bir sıra müəssisələr mövcuddur. Bu sahə ilə bağlı mütəxəssislər yetişdirən universitetlərin Sumqayıta köçürülməsi məsələləsinə baxıla bilər. Əlbəttə, bu, çox ciddi araşdırmalardan sonra mümkündür".

Aysel Yusifqızı

Telegramda izləyin