"İran hakimiyyəti hər zaman ermənipərəst mövqeyini nümayiş etdirib" - Deputat

"Zaman-zaman İranın Azərbaycan əleyhinə təxribata əl atdığı artıq rəsmi səviyyədə də müzakirə edilib".

Bu sözləri Sonxeber.az-a danışan deputat Müşfiq Cəfərov deyib.

Deputat vurğulayıb ki, 44 günlük müharibədən sonra İranın Azərbaycana qarşı aqressiyası daha açıq şəkildə özünü büruzə verir:

"Həmçinin, regionda baş verən geosiyasi dəyişikliklərin, Azərbaycanın İkinci Qarabağ müharibəsi sayəsində işğal edilmiş ərazilərini və İran-Azərbaycan sərhədində nəzarəti bərpa etməsi İranın maraqlarına cavab vermir. Ermənistan Azərbaycan torpaqlarını işğal altında saxladığı müddətdə İran həmin torpaqlarda qanunsuz olaraq fəaliyyət göstərib. İran hakimiyyəti hər zaman ermənipərəst mövqeyini nümayiş etdirib. 30 illik işğal müddətində İranın separatçı qurumla iş birliyi qurması, işğal altındakı Azərbaycan ərazilərində birgə qeyri-qanuni fəaliyyətlə məşğul olmasına dair saysız-hesabsız informasiyalar, faktlar var. Azərbaycan həmişə İranla sıx qonşuluq və tərəfdaşlıq münasibətlərinə can atıb, bir sıra mühüm regional layihələrdə onunla tərəfdaşdır. Lakin İran bütün qonşuluq, vahid din birliyi məsələsini unudub, Azərbaycan hökümətinin ona qarşı humanist dəyərlərinə qarşılıq olaraq təxribatlara əl atır.

İranın Azərbaycana bu cür yanaşma sərgiləməsinin səbəblərindən biri də İsraillə olan əlaqələrimizin yüksək səviyyədə olmasıdır .Amma onu da istisna etmək olmaz ki, yenicə müharibə bitmiş regionda gərginlik heç bir ölkənin marağında uyğun deyil".

Aysel Yusifqızı

Telegramda izləyin