Müəllim koronavirusa yoluxursa, siniflər bağlanmalıdır?

Bildiyiniz kimi, artıq təhsildə əyani tədris sisteminə keçid edilib. Pandemiya dövrü olduğu üçün siniflərdə yoluxma aşkarlanan zaman həmin siniflər 14 gün ərzində bağlanır. Amma məktəblərdə müəllimlər koronavirusa yoluxan zaman məktəblər bağlanmır. Nəzərə alsaq ki, virus hava yolu ilə keçir və müəllimlər də bir çox siniflərə daxil olur, o zaman bu qayda niyə müəllimlər koronavirusa yoluxan zaman tətbiq olunmur?

Məsələ ilə bağlı Sonxeber.az-a açıqlama verən təhsil eksperti Elçin Süleymanov bildirib ki, müəllimlər vaksin olunduğuna görə bu hal onlar üçün keçərli deyil:

"Pandemiya dövrü üçün Nazirlər Kabineti yanında Operativ Qərargahın təhsillə bağlı tövsiyələri var. Bu tövsiyələrə görə, sinifdə bir nəfərin virusa yoluxması sinif qapalı məkan olduğu üçün digər şagirdlər üçün potensial təhlükədir. Məntiqlə o sinfin bağlanması daha məqsədəuyğundur.

Müəllimlər isə şagirdlərdən daha diqqətlidir. Onlar həm dezinfeksiya işlərinə, həm də pandemiya qaydalarına daha yaxşı riayət edirlər.

Qeyd etmək istəyirəm ki, tədris 1-2 həftədir ki, başlayıb. Ciddi və təhsilin gedişatına mane olacaq qədər yoluxma sayı yoxdur.
Siniflərin qapadılmasında şagirdlərlə müəllimlər arasında əsas fərq ondan ibarətdir ki, məktəblərə gələn müəllimlər vaksin olunmuş olur və onların virusa yoluxma ehtimalı az olur".

Aytəkin CƏLALİ

Telegramda izləyin