"Şəhidlərin dəfn olunma mərasimində heç birinə fərq qoyulmadı"- Fuad Nurullayev

İstiqamət: Dini və milli tolerantlıq, millətlərarası münasibətlərin inkişaf etdirilməsi.

"Əgər milli və dini dəyərlərdən, qarşılıqlı münasibətlərdən danışırıqsa, bunlar Azərbaycanda çox yüksək səviyyədədir və xalq tərəfindən müsbət qarşılanır. Bizim xalqımız bu dəyərlərə sahibdir. Bu nə dünənin işidir, nə bu günün, bu, əsrlərdən gələn qan yaddaşımızdır. Azərbaycan xalqı öz Vətənində bir çox xalqların nümayəndələri ilə yaşayıb: yəhudilər, xristianlar və dinləri bir olan ləzgi, talış, kürd və digər müxtəlif millətlərlə. Bu xalqlar milliyyət və dini inanclarından asılı olmayaraq, birgə vəhdətdə mehribancasına yaşayaraq qardaşlığı qoruyurlar".

Bu sözləri Sonxeber.az-a açıqlama verən Qafqaz Müsəlmanları İdarəsi sədrinin müavini Fuad Nurullayev deyib.

O, Qubanın Qırmızı qəsəbəsində əsrlərdir yaşayan yəhudiləri, Şimal bölgəsində, Qaxda, Balakəndə yaşayan xristianları, gürcüləri misal çəkib:

"Təbii ki, dinləri ayrı olsa da, millətlərin, ayrı-ayrı xalqların bir birinə münasibəti yüksək səviyyədədir. Dövlətimizin multikultural dəyərlərlə, tolerantlıqla bağlı xüsusi proqramları var, səmimiyyəti, dostluğu, qardaşlığı saxlamaq üçün əlindən gələni edir. Dini rəhbərimizin də bununla bağlı atdığı addımlar var.

Bir sıra tədbirlər Ulu Öndər Heydər Əliyevin zamanından görülür. Məsələn, müsəlmanların adətinə görə, Mübarək Ramazan ayında iftar süfrələri verilir. Şeyxülislamın təşkil etdiyi iftar süfrəsində Prezidentimizlə yanaşı, xristian dininin rəhbərləri və digər icma nümayəndələri iştirak edirlər. Bunlar Azərbaycanda qardaşlığı, tolerantlığı tamlığı ilə göstərərək dünyaya bəyan edir.

Bu gün Azərbaycanda beynəlxalq multikulturalizm mərkəzi var. Bu mərkəz dünyanın onlarla ölkəsində tədrislə məşğul olur. Bu sahədə çox danışmaq olar.

Vətən müharibəsi dönəmində bir daha müxtəlif xalqların birliyinin şahidi olduq. Azərbaycanın ermənilər tərəfindən işğal olunmuş torpaqlarının azadlığı uğrunda canını fəda edənlərin arasında azərbaycanlılarla yanaşı, rus, yəhudi millətlərindən olan, fərqli dini inanclara malik insanlar var idi. Onlar çiyin-çiyinə döyüşüb qalib gəldirlər.

İstər dövlətimiz, istərsə də dini rəhbərlik tərəfindən həmin şəhidlərin dəfn olunma mərasiminin təşkilində heç birinə fərq qoyulmadı. Bu, Azərbaycanın multikultural dəyərlərə necə sahib olduğunun bariz nümunəsidir".

Material Azərbaycan Respublikası

dəstəyi ilə hazırlanmışdır.

ZAİRA AKİFQIZI

Telegramda izləyin