Hər kəsin sevimlisinə çevrilən müəllim niyə işdən çıxdı? - SƏBƏB

Artıq bir neçə ildir ki, xeyirxahlığı, kreativ dərs keçmə üsulu ilə seçilib sevilən və tez bir zamanda sosial şəbəkə fenomeninə çevrilən 30 yaşlı tarix müəllimi Həbib Əlizadədən xəbər var.

Onun vaxtilə Astaranın Şüvi kəndindən Lənkəranın dağlıq Gəgiran kəndinə uzun yol qət edərək məktəbdə işləməsi, yenilikçi kimi çıxış edərək musiqili və əyləncəli dərs keçməsi, velosipedlə kəndləri gəzərək şagirdlərə maraqlı kitablar paylaması ölkədə böyük marağa səbəb olub. Lakin hazırda Astara rayonu Ə.Əliyev adına Qapıçıməhəllə kənd ümumi orta məktəbində çalışan müəllim ikinci işindən ayrılıb.

Sonxeber.az xəbər verir ki, bu barədə Həbib Əlizadə özünün "Facebook" səhifəsində bildirib.

Hamının sevimlisi olan müəllim qarşılaşdığı haqsızlıqlar barədə yazaraq, işdən çıxma səbəbini belə açıqlayıb:

"Bu gün ikinci iş yeri kimi müvəqqəti işlədiyim Astara 2 nömrəli məktəbdən çıxdım. Əslində yanvara qədər işləyəcəkdim. Bəs niyə indi yekunlaşdırdım?

Deməli, kollektivin içindən bir qrup müəllim müvəqqəti işləməyə gəlsəm belə mənə qarşı sistemli işə başladılar. Əvvəlcə siniflərdə şagirdlərə mənim qeybətimi edib məni gözdən salmağa çalışdılar. Bu istədikləri nəticəni verməyəndə isə başladılar valideynlərin adından istifadə etməyə. Bu da istədikləri effekti vermədi.

Təsəvvür edin ki, qısa müddətdə hər sinif üzrə olimpiada üçün şagird seçib maddi qarşılıqsız olimpiada dərsləri təşkil etdim. Bir çox əlavə fəaliyyətlər etməyə başladım. Son nəticədə bütün məktəb bunlardan xeyir görəcəkdi. Amma nə etdilər? Demək olar ki, hər həftə növbə ilə dərs vaxtlarında sinfə girib dərsdən səs gəldiyini deyib şikayətlənməyə başladılar. Bunu sənədləşdirməyi təklif edəndə isə bundan imtina edirdilər.

Şagirdlərin qısa zamanda mənimlə səmimiyyətini görüb başqa bir yola əl atdılar.

Təəssüf ki, bir qrup şagirdi bu çirkin prosesdə istifadə edib mənə qarşı qaldırmağa belə çalışdılar. Hətta bir neçə şagirdə mənə qarşı ərizə yazdırmağa cəhd də etdilər.

Sonra mənim haqqımda şikayətlənməyə başladılar. Göstərdikləri səbəb həm gülməli, həm təhsilin vəziyyətinin nə qədər ağlamalı olduğunu göstərirdi. Deməli, şikayətdə deyiblər ki, Həbib müəllim şagirdlərə sərbəstlik verir, bu da onlara dərs keçməyə güya imkan vermir.

Bir anlıq özümün sanki 100 il geriyə qayıtdığımı hiss etdim. Elə bil zaman maşınına minib 2 nömrəliyə getmişdim. Əslində, bu şikayətlər onların niyə bu qədər narahat olduğunu açıq-aydın ortaya qoymağa yetirdi və artırdı da. Qurduqları avtoritar sistem öz təsirini itirməyə başlamışdı. Ona görə də "Ümumi məqsəd" üçün çalışırdılar. Və bütün bunların başında illərdir məktəbdə"kök" salmış səlahiyyətli şəxslərindən biri dururdu.

Təbii ki, bunları bütün kollektivə aid etmək olmaz, hörmət edənləri də çox gördüm. Amma təşkilatlanmış bir qrupa sanki hamı tamaşa edirdi.

Bütün bu proseslər bu şəkildə davam edəndə oturub çoxlu analiz apardım. Gördüm ki, hədsiz işlərimin içində bu tiplərlə məşğul olmağa dəymir. Çünki cəmi 2 aydan sonra onsuz da bura ilə sağollaşacağam.

Öz yenilikçi, təşəbbüskar həmkarına qarşı bu qədər sistemli və təşkilatlanmış şəkildə hörmətsizlik edənlərin arasında daha 2 ay işləməyə dəyməzdi. Vaxtından tez gedib belələrinin çirkabına bulaşmamaq və bunları öz çirkabıyla baş-başa buraxmaq lazım idi. Elə də etdim. Qalmaqal olmaması üçün vaxtından tez sağollaşdım.

O məktəbdə isə bu "qrup"un qarşısı alınmayınca heç bir keyfiyyətli iş görmək mümkün olmayacaq və bu məsələ tək mənimlə də məhdudlaşmır.

Ora təzə təyin olunan və fəaliyyətlərimə də müsbət yanaşan direktora bu gün ərizəni təqdim etdim. Direktora dedim ki, cəmi 2 ayda burada maksimum şəffaf işləməyə cəhd etdiyini gördüm. Ona görə də ona sadəcə səbir və dözüm arzu edirəm. Orada vicdanla çalışan müəllimlərə də bol səbir diləyirəm.

Amma kənardan ora baxıb övladlarınıza necə tip adamların müəllimlik etdiyini gördükdə insan sadəcə təəssüflənir. Bu həm də təhsilin düşdüyü vəziyyətin və onun xilasına çalışanların vəziyyətinin müqayisəli xülasəsidir".

ZAİRA AKİFQIZI

Telegramda izləyin