""Media haqqında" qanun layihəsi media islahatlarının tərkib hissəsidir" - Vasif Həsənli

Dekabrın 10-da Milli Məclisin Hüquq siyasəti və dövlət quruculuğu komitəsi ilə İnsan hüquqları komitəsinin birgə iclasında "Media haqqında" qanun layihəsinin ictimai müzakirəsi keçirilib. Fikirlər müxtəlifdir, Milli Məclislə yanaşı, sosial şəbəkələrdə də layihə geniş müzakirə olunub. Bəzi məqamlar isə ümumiyyətlə kontekstdən kənar müzakirəyə çıxarılıb və yanlış rəy yaradılıb. Söhbət vahid jurnalist vəsiqəsinin verilməsindən gedir, bunu bir qədər aydınlaşdırmaq lazımdır. Layihəyə əsasən, jurnalistlərin Media Reyestrinə daxil edilməsi könüllü xarakter daşıyacaq.

Qanun layihəsi ilə bağlı Sonxeber.az-a "Demokrat Media"nın rəhbəri Vasif Həsənli danışıb.

O bildirib ki, "Media haqqında" yeni qanunun qəbul edilməsi uzun illərin zərurətinə çevrilib:

"Çünki media davamlı olaraq dəyişir, inkişaf edir, yeni çağırışlarla uzlaşmağa çalışır, lakin bu sahəni tənzimləyən qanun 20 il öncə qəbul edilib və müasir dövrlə uzlaşmır. Bu da mediada problemlərin yaranması mənbələrindən biridir, çünki beynəlxalq təcrübə də göstərir ki, qanunlar yaxşı işlədiyi halda medianın məsuliyyəti güclü olur.

Bu qanun Prezident İlham Əliyevin media sahəsində islahatların aparılması siyasətinin tərkib hissəsidir. Prezidentin "Azərbaycan Respublikasında media sahəsində islahatların dərinləşdirilməsi haqqında" Fərmanının imzalanması ilə başlanan islahatlarda ilk olaraq struktur dəyişiklikləri edildi.

Belə ki, həmin Fərmanla Medianın İnkişafı Agentliyi yaradıldı. Ardınca qanunvericilikdəki boşluqların aradan qaldırılması istiqamətində zəruri olan addımlar atıldı. "Media haqqında" qanun layihəsi bu prosesin tərkib hissəsidir.

Qanun layihəsini incələdikdə mühüm dəyişikliklərin edildiyini görmək olur, xüsusilə müasir çağırışların nəzərə alınması, çap mediası ilə yanaşı, onlayn medianın, eləcə də sosial medianın məsuliyyət sahəsinin müəyyən edilməsi ən mühüm məqamlardandır.

Qanun layihəsi qəbul olunacağı təqdirdə, media subyektlərinin istehsal etdikləri məhsullar üzərindəki müəlliflik hüquqlarının qorunması təmin ediləcək. Bu, rəqabətin artırılması üçün ən vacib addımlardandır. Çünki mediada "köçürmə" prinsipi geniş şəkildə yayılıb və belə demək mümkünsə, çox az bir hissə xəbər istehsal edir, digərləri bu xəbərlərin arxasınca "sürünür". Bir çox hallarda müəlliflik hüquqları qorunmadan informasiyanın oğurlanması halları yaşanır. Nəticə etibarilə, rəqabətdən daha çox, qeyri-legitim yollar inkişaf edir.

Fikrimcə, qanun layihəsi bütün bu kimi problemlərin aradan qaldırılmasına kömək edəcək, xəbər uğrunda mübarizə, informasiya istehsalı bacarıqlarının inkişafını təşviq edəcək və peşəkarlığa gətirib çıxaracaq. Ümumilikdə isə bu, medianın inkişaf edəcəyi deməkdir!"

ZAİRA AKİFQIZI

Telegramda izləyin