"Yeni qanun layihəsi KİV-lərin peşəkarlaşmasını stimullaşdıracaq" - Müşfiq Ələsgərli

Azərbaycan Respublikasında çox gözlənilən qanun layihəsi hazırlanıb və artıq müzakirə olunur. "Media haqqında" yeni qanun layihəsində media sahəsində fəaliyyətin təşkilati, hüquqi və iqtisadi əsasları, həmçinin kütləvi informasiyanın əldə edilməsi, hazırlanması, ötürülməsi, istehsalı və yayımının ümumi qaydaları öz əksini tapıb. Bu qanun layihəsinin müsbət tərəfləri nələr olacaq?

Mövzuyla bağlı Jurnalistlərin Həmkarlar İttifaqının sədri, media eksperti Müşfiq Ələsgərli Sonxeber.az-a açıqlama verib.

O bildirib ki, "Media haqqında" qanun layihəsi yeniliklərlə zəngindir və inkişafı stimullaşdırır:

"Bu qanun layihəsi Azərbaycanda indiyədək tətbiq edilməmiş yeniliklərlə zəngindir. İlk olaraq, onlayn medianın hüquqi statusunun tanınması, strukturlaşması barədə təsəvvürün yaranması baxımından önəmlidir. Yeni qanunun qəbul edilməsi medianın hüquqi tənzimlənməsindəki boşluğu aradan qaldıracaq.

Bundan əlavə, vahid reyestrin tətbiq edilməsi nəzərdə tutulur ki, bu da çox önəmli məqamdır. Vahid reyestrin olması ölkədə KİV-lər üçün strateji inkişaf proqramlarının hazırlanmasını da asanlaşdıracaq. Yeni qanun layihəsi həm də KİV-lərin peşəkarlaşmasını stimullaşdıracaq.

Jurnalistlər üçün vahid formalı vəsiqələrin tətbiq edilməsini də dəstəkləyirəm. Vahid formalı kartı əldə edən jurnalistlər qanunla nəzərdə tutulan bir sıra imtiyazlardan faydalana biləcəklər.

Hərbi və fövqəladə vəziyyət hallarında davranış standartları, insanların şəxsi həyatına müdaxilənin yolverilməzliyi, təhqir və böhtanın qarşısının alınması, müəllif hüquqlarının qorunması və sair halların hamısı detallı şəkildə layihədə öz əksini tapıb və bu cür hallarda jurnalistlərin digər hansı mənbələrə istinad edəcəkləri də göstərilib.

Layihədə nəzərdə tutulan ən önəmli məqamlardan biri də "freelancer" (sərbəst çalışan) jurnalistlərin hüquqlarının tanınmasıdır. Onlayn medianın inkişafı sərbəst çalışan jurnalistlərin kəmiyyətini artırıb, amma indiyədək onların hüquqları tanınmırdı. Yeni qanun bu problemi də aradan qaldırır.

Bununla yanaşı, layihənin dili üzərində işlənilməsi, korrekturaların edilməsi, bəzi maddələrə yenidən baxılması, konkretləşdirilməsi zərurəti də var".

Aysel Səfərzadə

Telegramda izləyin