"Bundan sonra "COVID-19" infeksiyası həmişə..." - İnfeksionistdən AÇIQLAMA

""COVID-19" ilkin yayıldığı dövrdə olduğu kimi güclü təsirə malik deyil".

Bunu infeksionist Vüqar Cavadzadə Sonxeber.az-a açıqlamasında bildirib.

O qeyd edib ki, "COVID" infeksiyasının gücü azalmaqdadır, virus getdikcə mutasiyaya uğrayır və ölüm hallarında da azalma müşahidə olunur.

Əvvəl karantin müddəti 14-21 idisə, son tədqiqatların nəticələri göstərir ki, xəstəliyin həm inkubasiya dövrü, həm də yoluxdurma müddəti 6-7 gün çəkir.

İnfeksinonist xatırladıb ki, 2020-ci ildə İtaliyada gün ərzində 3-4 min ölüm halı qeydə alınırdı, reanimasiyalarda, xəstəxanalarda yer tapmaq olmurdu:

"Hazırda Fransada yoluxma sayı 100 000-dən çoxdur, amma görürük ki, reanimasiyalarda əvvəlki illərdə olduğu kimi yüklənmə yoxdur. İlk dalğa zamanı ölüm sayı gün ərzində 3000-3500 idisə, hazırda bu rəqəmlər yoxdur. Deməli, belə nəticəyə gəlmək olur ki, "COVID" virusu öz gücünü itirməkdədir və xəstəlik daha yüngül formada keçir.

Çox güman ki, yaxın illərdə koronavirus pandemiyası bitəcək. Amma bu o demək deyil ki, "COVİD"dən canımızı qurtaracağıq. Koronavirus infeksiyası getdikcə gücünü zəiflədir, xəstəliyin davam etmə müddəti azalır və özünü adi qripə bənzədir. Bundan sonra yaşadığımız müddətdə "COVID" infeksiyası adi qrip infeksiyası kimi həmişə cəmiyyətdə müşahidə olunacaq".

Qeyd edək ki, Azərbaycanda bu gündən test nəticəsi "müsbət" olan şəxslərin və onlarla sıx təmasda olanların təcrid (karantin) müddəti 14 gündən 7 günə azaldılıb.

Aygün Osmanlı

Telegramda izləyin

instagramda izləyin