"Mehriban xanım, ilk növbədə, böyük humanist şəxsiyyətdir" - Aydın Hüseynov

"Mehriban xanım Əliyeva Birinci Vitse-prezident vəzifəsində səmərəli fəaliyyəti ilə xalqın dərin etimadını qazanıb".

Bu sözləri Sonxeber.az-a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov Mehriban xanım Əliyevanın 2017-ci ildə Azərbaycan Respublikasının Birinci Vitse-prezidenti təyin olunması ilə əlaqədar tarixi hadisəni şərh edərkən söyləyib.

O bildirib ki, Mehriban xanım Əliyeva Prezident İlham Əliyevin ən yaxın və etibarlı silahdaşı olaraq müstəqil, güclü və sabit Azərbaycanın sütunlarını daha da möhkəmləndirmək uğrunda tükənməz əmək sərf edən qadın liderdir:

"Heydər Əliyev Fondunun prezidenti kimi Mehriban Əliyeva ötən illər ərzində ölkəmizin quruculuq tarixində öz dəst-xətti və imzası olan şəxsiyyətdir. O, böyük humanizmi, xeyirxah əməlləri və qayğıkeşliyi ilə hər bir Azərbaycan vətəndaşının ürəyinə yol tapmışdır. Onun həm də Azərbaycanın ictimai-mədəni intibahında oynadığı misilsiz rolun hüdudları çox genişdir. Həmçinin, xarici ölkələrdə çoxşaxəli zəngin humanitar missiyası ilə şöhrət qazanmışdır. Statusuna görə də yetərincə nüfuzlu ictimai-siyasi xadim kimi onun dövlətimizin inkişafında misilsiz xidmətləri var. Hakim Yeni Azərbaycan Partiyası sədrinin müavini kimi olduqca məsuliyyətli vəzifəni daşıyan Mehriban xanım ictimai fəaliyyəti ilə ölkəmizin siyasi həyatına yeni rəngarənglik gətirmişdir. Onun Azərbaycan Respublikasının Birinci vitse-prezidenti vəzifəsinə təyin edilməsi də bu əvəzsiz xidmətlər verilən ən böyük dəyər idi".

A.Hüseynov qeyd edib ki, cəmiyyətimiz Mehriban xanım Əliyevanı humanist, xeyriyyəçi, nüfuzlu ictimai-siyasi xadim kimi tanıyır:

"Mehriban xanım, ilk növbədə, böyük humanist şəxsiyyətdir. Heç də təsadüfi deyildir ki, Mehriban xanım 4 dəfə – 2007, 2009, 2013 və 2016-cı illərdə amnistiya təşəbbüsü ilə çıxış edib. Bu, Mehriban xanımın insan hüquq və azadlıqlarına necə həssaslıqla yanaşdığının təsdiqidir. Azərbaycan parlamentarizmi tarixində ilk dəfə olaraq Milli Məclisin deputatı tərəfindən irəli sürülən bu təşəbbüs geniş ictimai dəstək qazanıb. Çünki amnistiya aktı qanunverici tərəfindən ifadə olunan humanizm və mərhəmət hissinin mücəssəməsidir. O, hələ Milli Məclisin deputatı seçildiyi gündən Azərbaycan dövlətçiliyinin – milli müstəqilliyinin qorunmasına, ölkəmizin ikitərəfli və çoxtərəfli xarici əlaqələrinin inkişafına, əhalinin sosial vəziyyətinin daha da yaxşılaşmasına xidmət edən qərar və qanunların qəbul olunması üçün mühüm təşəbbüslərlə çıxış etmiş, müstəqil Azərbaycanın müasir mənzərəsinin daha da zənginləşməsində müstəsna rol oynamışdır".

Millət vəkilinin sözlərinə görə, Mehriban Əliyeva nəcib və xeyirxah insan kimi genişmiqyaslı və fədakar fəaliyyətinə görə bir çox beynəlxalq təşkilatlar, dövlətlər tərəfindən yüksək mükafatlara layiq görülüb:

"Azərbaycanda xeyriyyəçilik və mesenatlıq ideyalarının bərqərar edilməsinə, Azərbaycan xalqının şifahi ədəbi və musiqi irsinin qorunub saxlanmasına və inkişafına, yetim uşaqlara, qaçqınlara, xəstələrə yardım üzrə genişmiqyaslı aksiyalara yönəldilmiş fəaliyyəti dünya miqyasında böyük əks-səda doğurmuşdur. Azərbaycanın Birinci xanımı Avropada Olimpiya hərəkatına verdiyi töhfəyə görə də, yüksək mükafatla təltif olunub. 2016-cı il yanvarın 21-də Avropada idmanın inkişafında göstərdiyi xüsusi xidmətlərə görə Avropa Olimpiya Komitələrinin İcraiyyə Komitəsinin qərarı ilə Avropa Olimpiya Komitələrinin ən yüksək mükafatı olan Ali Ordeni ilə təltif edilmişdir. 2009-cu ildə "Heydər Əliyev mükafatı"na, 2015-ci ildə "Heydər Əliyev" ordeninə layiq görülməsi də onun çoxşaxəli fəaliyyətinə verilən ali qiymətin ifadəsidir. Çoxşaxəli zəngin fəaliyyəti ilə xalqın tükənməz sevgisini qazanan Mehriban Əliyevanın ölkəmizdə mühüm dövlət postuna - Birinci vitse-prezidenti vəzifəsinə təyin edilməsindən sonra Cənab Prezidentin həyata keçirdiyi müdrik və uğurlu siyasi xətt daha da möhkəmlənmişdir. Mehriban xanım Əliyeva Birinci vitse-prezident postunda ümummilli məqsədlərə xidmət edən ardıcıl və səmərəli fəaliyyətini daha da qətiyyətlə davam etdirərək, xalqın sonsuz inam və etimadını doğrultmağa müvəffəq olubdur. Biricni vitse-prezident kimi Mehriban xanımın dövlət aparatının daha səmərəli işləməsində, qərarların daha yaxşı icra olunmasında böyük xidməti var. Onun bu fəaliyyəti dövlət aparatının nüfuzunu artırır, yüksək idarəetməni təmin edir və hakimiyyətin ictimai dayaqlarının daha möhkəm olmasına xidmət edir. Azərbaycanın Birinci vitse-prezidentinin inkişafa doğru hər addımı sosial reallığı dəyişən, daha gözəl, daha sağlam, hər kəs tərəfindən məmnunluqla qarşılanan yaradıcılıq məzmunu təqdim edir. Hər zaman olduğu kimi Mehriban xanım hazırda Cənab Prezidentlə birgə Azərbaycanın qürurverici yeni tarixinə öz zəngin imzasını atmaqdadır. 44 günlük Vətən müharibəsində Zəfər qazanan Ali Baş Komandan və Onun Müzəffər Ordusunun məğrur dayandığı işğaldan azad edilmiş torpaqlarımıza baş çəkir, davamlı səfərlər zamanı aparılan bərpa və quruculuq işləri ilə birbaşa tanış olur, mühüm obyektlərin təməlini atır, tarixi torpaqlarımızın dirçəldilməsində, mədəniyyət paytaxtımız olan Şuşanın tarixi simasının özünə qaytarılmasında və azad edilmiş ərazilərimizin sürətli quruculuğunda fədalarlığını əsirgəmir".

Aysel SƏFƏRZADƏ

Telegramda izləyin