Məktəblinin ailə qurduğunu bilib gizlədən müəllim və direktor cəzalandırılmalıdırmı?-AÇIQLAMA

Artıq bir neçə gündür ki, azyaşlıların erkən nigaha daxil olması ilə bağlı müxtəlif bölgələrdən xəbərlər alırıq. Bu gün azyaşlı bir məktəblinin ailə qurmasını bilib gizlədən müəllim və direktor da cəzalandırılmalıdırmı?

Məsələ ilə bağlı Sonxeber.az-a təhsil eksperti Elşən Qafarov açıqlama verib.

O bildirib ki, uşaq hüquqları haqqında Azərbaycan Respublikasının qanunu və yetkinlik yaşına çatmayan uşaqların hüquqları ilə bağlı dövlətin vəzifələri var:

"Eyni zamanda, yetkinlik yaşına çatmayan uşaqların hüquqlarının proflaktikası üzrə Prezidentin əlavə bir sərəncamı var və orada kimin hansı məsələyə cavabdeh olduğu konkret göstərilir. Bu məsələyə nəzarət üçün rayon icra hakimiyyətləri nəznində olan qəyyumluq üzrə komissiya təşkil olunur.

Təsəvvür edin azyaşlının toyu olur, ərazi icra nümayəndəsi, sahə müvəkkili yerli bələdiyyə, müvafiq orqanların cavabdeh şəxsləri o toyda yeyib-içib, oynayırlar, azyaşlını gəlin köçürdürlər, amma nəticədə məktəb günahkar hesab olunur. Məktəb nə edə bilər? məktəbin əlində nə səlahiyyətlər var? Məktəb sadəcə uşaq məktəbə gəlmədikdə rayon polis idarəsinə xəbər göndərə bilər. Məktəb sadəcə qayib yazır, vəsssalam. Onun səlahiyyəti ora qədərdir.

Polisə müraciət etsələr də, polis yaxşı bilir ki, hansı azyaşlı nişanlıdır, hansı sözlüdür, hansı gəlin köçüb, hansının övladı var. Hətta azyaşlıların əksəriyyəti bir çox hallarda ev şəraitində ana olurlar Bilirlər ki, xəstəxanaya getsələr, xəstəxana dərhal bu məsələylə bağlı tədbir görəcək.

Vaxtilə Cənub bölgəsində bu məsələ kütləvi hal almışdı, indi isə Sabirabad rayonu ölkə üzrə birinci yerdədir. Övladını erkən evləndirən valideynlər cinayət məsuliyyətinə cəlb olunurlar. Bu, bilərəkdən uşaq hüquqlarını pozmaqdır. 18 yaşı tamam olmayan şəxslər uşaq sayılır və uşaq birbaşa dövlətin himayəsindədir. Əgər valideyn uşağa qarşı bu cinayəti törədirsə, qanun qarşısında cavab verməlidir. Vaxtilə çox dəb olan "qız qaçırtma" ilə bağlı cinayət məcəlləsində dəyişiklik edildi və hazırda bu əməl adam oğurluğu hesab olunduğu üçün artıq belə hallar demək olar, sıfıra endirilib.

Hansı ərazi icra vahidində bu tip hallar baş versə, həmin ərazinin icra nümayəndəsi haqqında cinayət işi qaldırılmalıdır. Hansı sahə müvəkkilinin ərazisində baş verirsə, o ərazi nümayəndəliyi məsuliyyət daşıyır.

Unutmayaq ki, bu qızlar bizim övladlarımızdır, gələcək övladların anasıdır və bu kimi xoşagəlməz hallar bizə çox ciddi zərər vurur. Ona görə də onların baş verməməsi üçün ciddi mübarizə aparılmalıdır".

ZAİRA AKİFQIZI

Telegramda izləyin