Jalə Həsənli partlayışla bağlı: "Bu qədər nifrət, əsəb, aqressiya ilə hara gedirik?"

Son günlər paytaxtda ard-arda baş verən hadisələr narahatlıq doğurur. Lakin təəssüf ki, bir çoxları baş verən hadisənin dəhşətinə köklənmək əvəzinə, digər absurd mövzularda müzakirələr apardılar.

Sonxeber.az-ın məlumatına görə, məsələ ilə bağlı tanınmış aparıcı Jalə Həsənli yaranan bu situasiyaya öz şərhini bildirib:

"Son günlərdə baş verənlərlə bağlı nəsə yazmaq istədim, əlim gəlmədi. Sadəcə susdum...

Nə baş verir? Bu qədər nifrət, əsəb, aqressiya ilə hara gedirik? Hara çatacağıq? Lap çatdıq, yanımızda kim olacaq? Niyə bu qədər maraqlıyıq başqalarını müzakirə etməyə? Qarşımızda çilik-çilik olmuş pəncərəni görmək yerinə, çərçivəsindəki balaca ləkəyə niyə ilişib qalırıq? Hadisələrin mahiyyəti qalır kənarda, biz lazımsız nüansları qabardırıq.

Başımız qarışdı insanların gecə həyatına, parlaq gələcəyini söndürən bir gəncin intihar etdiyini görmədik. Yoxsa gördük, amma kiminsə gecə klubunda rastlaşdığı bədbəxt hadisənin müzakirəsi daha maraqlı gəldi? Vətən müharibəsi iştirakçısını deyirəm. Xüsusi Təyinatlı Qüvvələrin tərkibində döyüşmüş, Şuşanın, Füzulinin, Xocavəndin, Cəbrayılın azad olunmasına görə və "Şücaətə görə" medalları ilə təltif olunmuş, 2000-ci il təvəllüdlü Babakişiyev İsmət Namiq oğlu özünü asaraq intihar edib. Həm də ad günündə. Bunu müzakirə etdiniz? Onu bu yoldan çəkindirmək üçün cəmiyyət olaraq nəsə addım atdıq? Axı bizim üçün döyüşmüşdü!

Hər gün Fərrux kəndi yaxınlığında daha bir azərbaycanlı meyidinin qalıqları aşkarlanır. Amma biz bunu müzakirə etmirik. Dünyaya ermənilərin bu vəhşiliyini yaymaq yerinə, öz çatışmazlıqlarımızı daha çox qabardırıq.

Bəs yeni doğulan körpəsini qəsdən öldürüb, zibilliyə atan qadın haqqında necə? Oxudunuz? Özümüzə heç sual verdikmi hansı tərbiyədə övladlar böyüdürük ki, onlar böyüyüb öz övladına qıyacaq qədər rəhmsiz olurlar?! Harada səhv edirik?

Məqsədim heç kimə ağıl öyrətmək deyil, əstəğfirullah, hər kəs özünə görə ağıllı, özünə görə haqlıdır. Sadəcə unutmamalıyıq, bu gün olduğumuz yeri Allah saniyələr içində bizdən alar, yerlə bir olarıq. Kimisə qınamadan öncə bunu düşünək. İnsan qınadığını yaşamamış köçmür bu dünyadan.

Hə, bir də. Ramazan ayıdır axı. Əsl oruc həm də qul haqqı yeməməkdir və 12 ay tutulur. Bu qədər nemət varkən, qul haqqı yeməyək!"

Aysel SƏFƏRZADƏ

Telegramda izləyin