Şuşada parlament binası tikiləcək? - AÇIQLAMA

Aprelin 8-də Şuşa şəhərində ilk dəfə olaraq Milli Məclisin Hüquq siyasəti və dövlət quruculuğu, Müdafiə, təhlükəsizlik və korrupsiya ilə mübarizə komitələrinin birgə iclası keçirilib.

Məsələ ilə bağlı Milli Məclisin deputatı Vüqar İskəndərov "Sonxeber.az"a açıqlama verib.

O bildirib ki, bu iclas Azərbaycan Parlamenti tarixində bir ilkdir:

"Burada iki məsələ qoyulmuşdu və bunların final iclasa təqdim olunması üçün bütün deputatlar səs verdi. Əsas məsələ iclasın rəmzi məna daşımasıdır. Çünki Şuşa bizim baş tacımızdır və bu şəhərdə Azərbaycan Parlamentinin iclasının keçirilməsi tarixi bir hadisəyə döndü. Biz bu şərəfli missiyanı keçirən insanlardan biri olduğumuz üçün özümüzü xoşbəxt sayırıq.

Azərbaycan Parlamenti şərəfli yollar keçib. Zamanın bütün çətin vaxtlarında, Ümummilli liderimiz Parlamentin sədri olduğu müddətdə onun ustalıqla keçirdiyi daxili və xarici siyasət ölkəmizin möhkəmlənməsinin bünövrəsini qoydu. Cənab Prezidentimiz yeni mərhələdə bu siyasəti uğurla, keyfiyyətlə, qətiyyətlə, şərəflə davam etdirir. Bu gün Parlament də həmin şərəfli yolla gedir.

Biz, parlament üzvü olaraq, hesab edirik ki, səfərbərlik elan olunması, qələbəmiz üçün siyasi məsələlərdə bütün deputatların aktiv iştirak eləməsi, ölkənin talehüstü məsələlərində deputatların fəallığı, bir çox vacib məsələlərin qanunla qəbul edilməsində parlamentin rolu böyükdür.
Bu gün də Azərbaycan Parlamentinin Milli Məclisinin iki komitəsinin Şuşa şəhərində iclas keçirməsi artıq bu tarixə yazılmış oldu.

Həmin iclasda iştirak etdiyim üçün özümü xoşbəxt sayıram. Təkliflərimdən biri o oldu ki, yenidənqurma işlərindən sonra bu şəhərdə gözəl saray tikilsin və parlament iclasları orada keçirilsin.

Düşünürəm ki, gələcəkdə parlament iclaslarının Şuşada keçirilməsi tarixi bir hadisə olacaq və biz, xalq olaraq, həmin günləri yaşayacağıq. Ali Baş Komandanın "Dəmir Yumruğ"u sayəsində Azərbaycan Parlamenti tarixində böyük bir hadisə olacaq və həmin günlər çox uzaqda deyil. Azərbaycan xalqı da bu hadisədən qürur duyacaq".

Aysel Quliyeva

Telegramda izləyin