"Cəmi 30 manat cərimə olunmaqla canlarını qurtaracaqlar" - Ekspertdən ETİRAZ

"Gecə klubunda baş verən dəhşətli partlayış hadisəsi propan qaz balonlarının nə qədər təhlükəli olduğunu bir daha göstərdir. Bu hadisədən sonra ictimai-iaşə obyektlərində, kafə və restoranlardan propan qaz balonlarının yığılması üçün əlaqədar qurumlar reydlər keçirirlər. Sahibkarlara bu qaz balonlarının obyetklərdən kənarlaşdırılması barədə xəbərdarlıq edilir. Təbii ki, bu belə də olmalıdır. Qanunla qaz balonlarının ictimai-iaşə obyektlərində istifadəsi qadağandır".

Bu sözləri Sonxeber.az-a açıqlamasında təhlükəsizlik üzrə ekspert Elmar Nurəliyev deyib.

O, qeyd edib ki, propan qaz balonlarını obyektlərdən götürmək üçün heç bir quruma qanuni səlahiyyət verilməyib:

"Lakin qaz balonlarını kim kənarlaşdıracaq, necə kənarlaşdıracaq və hara kənarlaşdıracaq? Bu, sual doğurur. Bununla bağlı heç bir dövlət qurumuna səlahiyyət verilməyib. Nə FHN-nin Dövlət Yanğın Nəzarəti Xidmətinin, nə "Azəriqaz" İB-nin, nə də Energetika Nazirliyinin bununla bağlı səlahiyyəti yoxdur.

Halbuki qaz balonlarını obyektlərdən aparmaq üçün hansısa qurumun bununla bağlı səlahiyyəti olmalıdır. Qaz balonları xüsusi maşınlarda və bununla bağlı ayrılmış xüsusi yerə, poliqona aparılmalıdır. Orada istifasəsi yararsız olan balonların utilizasiyası olmalıdır. Ancaq indiki halda bu qaz balonlarının doldurulması, daşınması, ünvanlarda quraşdırılması və onlara texniki qulluğun göstərilməsinə hansı qurum nəzarət edir?

İnsanlar rahatlıqla yanacaqdoldurma məntəqələrində bu balonlarını doldurub şəxsi maşınla daşıyırlar. Hansısa qurum obyektlərdən yığışdırıb aparsa belə, bu qaz balonlarını hara aparacaq? Harada saxlayacaq? Necə utilizasiya edəcək? Bu işlərin həyata keçirilməsi üçün qanun layihəsinin qəbuluna və mövcud qanunvericilikdə əlavə və dəyişikliklərin edilməsinə ehtiyyac var.

Bu gün isə bu qaz balonlarını obyetkdən kənarlaşdırmaq vətəndaşın ixtiyarında qalıb. Vətəndaş da qaz balonunu (qanunla qadağan olsa da) öz şəxsi maşınına qoyub aparır və ya evində, ya həyətində, ya da obyetin çölündə saxlayır. Belə olan halda təhlükə yenə də qalmaqdadır. Yenə də istifadəyə davam etdikdə isə, ən yaxşı halda, aşkarlanacaq və fiziki şəxslər cəmi 30 manat cərimə olunmaqla canlarını qurtaracaqlar".

ZAİRA AKİFQIZI

Telegramda izləyin