Qarayev xəstəxanasında VİCDANSIZLIQ: Qucağında körpəsi ilə...

Bildiyiniz kimi, son günlər uşaqlar arasında rotavirus adlı infeksiya yayılıb. Bununla bağlı xəstəxanaya müraciət edən valideynlərin sayı günü-gündən artır.

Belə valideynlərdən biri də elə özüm idim. Müraciət etdiyimiz Ə.Qarayev adına 2 nömrəli Klinik Uşaq Xəstəxanasının təcili tibbi yardımında rotavirusa yoluxan uşağa kəskin qastrit diaqnozu qoyuldu və mütləq xəstəxanaya yerləşdirilməli olduğu bildirildi. 19 aylıq körpədə kəskin qastritin olmasının mümkünsüzlüyünü bildiyim üçün razı olmadım.

Qusma və ishaldan bədənində mayenin azaldığı üçün sistem qoşulmasını tələb edib, evə qayıtdıq. Sistem bitənədək müşahidə etdiyim mənzərə məni çox məyus etdi.

Belə ki, xəstəxana icbari tibbi siğortaya keçdiyi üçün heç bir xəstəyə qeydiyyata alınmadan baxılmır, onlar palataya yerləşdirilmirdi. Gələn xəstələrin 90 faizinə də orada olan növbətçi həkim mütləq xəstəxanada yatmalı oluğunu deyirdi. Gözümüzün qarşısında iki ailə qucağında körpəsi ilə evdən sənədin gətirilməsini gözləyirdi. Hətta valideynlərdən biri həyəcan və qorxudan evdən ayaqyalın çıxıb gəlmişdi.

Bir valideynə, bir körpəyə bunları etmək hansı vicdana sığır? Tibbi siğorta vətəndaşlara kömək üçündürsə, bu baş verənlər kimin səhvidir? Əsas məsələ olaraq, onu da qeyd edim ki, baxıl geyinmədən içəri buraxmadıqları valideynlərin heç maska taxmasına fikir verilmirdi, üstəlik, tibb bacıları və digər işçilərin də bir çoxunda maska yox idi.

Sonxeber.az olaraq məsələ ilə bağlı aidiyyəti qurumlarla əlaqə saxlamağa çalışsaq da, zənglərimizə cavab verən olmadı. Qarşı tərəfin mövqeyini dərc etməyə hazırıq.

Aysel SƏFƏRZADƏ

Telegramda izləyin