"Əziz danabaşlarımız..." - Deputatdan onu tənqid edənlərə CAVAB

"Əvvəl Azərbaycan vətənşüvənləri bolluğuydu. İndi də ukraynaşüvənlər, rusiyaşüvənlər, qərbşüvənlər, iranşüvənlər yağışdan çıxmış göbələk kimi artmağa başlayır. Biri "Mağara tv" açıb, digəri "Nağara tv" açıb, Azərbaycandan başqa hamının dərdini özlərinə yükləyiblər. Az qala Rusiyanın üstünə çığırırlar ki, "niyə bizimlə deyil, Ukrayna ilə savaşırsan?""

Sonxeber.az-ın məlumatına görə, bu sözləri millət vəkili Fazil Mustafa deyib.

O bildirib ki, Azərbaycan dövləti Ukraynaya humanitar dəstək versə də, insanlar yenə narazıdırlar:

"Yenə də narazıdırlar ki, "niyə ordunu köməyə göndərmirsən?" İndi soruşurlar ki, Ukrayna və ya Rusiya tərəfindən savaşa qatılan Azərbaycan vətəndaşlarına qanununvericiliyin münasibəti necə olacaq? Bir hüquqşünas kimi sadəcə qanunvericiliyi izah edirsən, baxırsan ki, bu danabaşlar hər tərəfdən doluşdular. Deputatın Ukraynada savaşanları cinayətkar adlandırmasına etiraz etdilər. Bir yandan "Mağara tv", digər yandan "Nağara tv" özləri üçün çal-çağır düzəldirlər ki, guya Fazil Mustafa Ukraynada savaşanların həbs olunmasını istəyir.

Əziz, ayrılmaz və əhəmiyyətli hissəmiz olan milli danabaşlar! Qanunu olduğu kimi şərh etmək kiminsə həbs olunmasını istəmək, yaxud da Ukraynaya qarşı olmaq deyil. Qanunvericilikdə İran, Suriya, Ukrayna, Əfqanıstan, Rusiya adı keçmir, sadəcə yazılır ki, başqa ölkələrdə qanunsuz silahlı birləşmələrdə savaşa qatılanlar cinayət məsuliyyətinə cəlb olunurlar. Bu, yalnız Azərbaycan vətəndaşı olan şəxslərə aiddir. Ukrayna vətəndaşı olan azərbaycanlılara aid deyil.

Bir də gələcəkdə bu şəxslər məsuliyyətə cəlb olunarsa, yenə də onların ilk müdafiəçisi biz olacağıq. Çünki Ukraynanın müstəqilliyinin qorunmasına, işğaldan qurtulmasına baxışımız hər kəsə bəllidir.

Əziz danabaşlarımız, ukraynaşüvənlərimiz, rusiyaşüvənlərimiz, qərbşüvnlərimiz, iranşüvənlərimiz, bir az imkan tanıyın, Fərruxdan irəli addımlayaq, Ağdərədə yeni postlarımızı quraq, Laçında gedib oturaq, Zəngəzur yolunun təməlini ataq. Bilirəm, hamınız qlobal dünya ilə uğraşırsınız, qafanız və ruhunuz oralarda gəzişir, burada da, heç olmasa, Azərbaycansevərlərə imkan tanıyın, mümkün olanı dünyanın başının qarışdığı zamanda etsinlər.

Maraqlısı burasındadır ki, özünü ağıllı göstərənlərin çoxu da bu anlaqsız yolu izləmək üçün yarışır. Yenə də əvvəl söylədiyim fikri təkrarlamaq istəyirəm: Azərbaycanda nə 4-cü, nə 5-ci, nə də 6-cı kolon təhlükəsi yoxdur. Təhlükəli olan, təəssüf ki, kolon sayında deyil, ordudur, ordu. Cahillər Ordusu! Vətənşüvənlər Ordusu! Bunların bizi iki il öncəki nöqtəyə qaytarmaması üçün hər gün dua edirəm".

ZAİRA AKİFQIZI

Telegramda izləyin