Efir olub "bazar", "min bir xırdavat", kimdə nə yoxdur, çıxıb ondan danışır...

Sizə nədən deyim, nədən danışım? Gözəl televerilişlərimizdən...

Bizim efirləri, demək olar ki, izləmirəm. Lakin sağ olsun evimizin ağbirçəkləri, bəzən onlara görə məcbur qalıb izləməli oluram.

Təəssüf ki, efir olub "bazar". Kimdə nə yoxdur, çıxıb ondan danışır. Ay qurban olum, hamı olub namuslu, pis ərdən qaçan, şiddət görən qadın olub namussuz. Məsələ nədədir?

Deməli, bu yaxınlarda sosial şəbəkədə qarşıma bir video çıxdı. Həmin videoda narkoman ərdən qaçıb efirə gələn qadın müzakirə obyektinə çevrilmişdi. Hər kəs təkidlə onu barışmağa vadar edirdi. Axı niyə də, niyə?! "Barış" deyənlər, görəsən, öz qızlarına narkoman ərlə yaşamağı rəva bilərmi? Əlbəttə, yox! Sabah o xanımın başına iş gələndə də, efirə gəlib deyəcəklər ki, günah elə adama qız verən valideyndədir! Hələ "ər" gül alıb gəlir və arsız-arsız deyir: "Döymüşəm, qələt eləmişəm. Bağışla!"

Digər tərəfdən, aktrisa efirdə başqa bir qadını açıq şəkildə, kobud sözlərlə təhqir edir. Bildiyim qədərilə, efirə səs bir neçə saniyə gec verilir. O an araya reklam da vermək olar. Amma etmirlər. Niyə?..

Həkim məsələyə qarışır, vəkil təhqir edir, hətta psixoloq da səs yüksəldir. Elə psixoloqa hansı "ağıllı" müraciət edər?!

Hələ yeni dəb olub: ""Sən" yox, "siz" deməlisən!". Xeyir ola?! O sözü deyənin özü məgər qarşısındakına "siz" deyə müraciət edir?!

Bir sözlə, verilişlərin istiqaməti sosial olsa da, əslində "min bir xırdavat"dır, pozğunluq təbliğ edilir.

Biri çıxıb deyir ki, arvadı kişilərlə danışır, digəri arvadının evdən qaçdığından şikayətlənir. Aparıcılar isə bütün təfərrüatları elə efirdə, izləyicilərlə birgə öyrənirlər.

İştirakçılar "ağızlarına gələni" danışırlar. Artıq insanlarda abır-həya deyilən bir şey qalmayıb. Kişi də uşaqlarının anası olan qadını efirdə müzakirə edər?! Qaçıb? Boşa, getsin! Efirə çıxıb özünü biabır etmə!

Evdən qaçanın niyə qaçdığını araşdırın! Yoxsa aktrisanı, müğənnini kimisə yıxıb-sürümək, təhqir etmək üçün gətirmək nədir?! Reytinq xatirinə kiminsə şəxsiyyətini alçatmaqdansa, ərindən qaçanı və ya bacısını, qızını, gəlinini döyəni efirə çıxarmaqdansa, gedin, xəstə uşaqlara yardımınızı davam etdirin.

Ümid edirəm, MTRŞ bununla bağlı bir tədbir görər və bu kimi biabırçı halları efirdən ləğv edər!

ZAİRA AKİFQIZI

Telegramda izləyin