Karantin dövründə tətbiq olunan cərimələr silinəcək?- AÇIQLAMA

Karantin rejiminin yumşaldılması, maska rejiminin qismən ləğvi artıq ağıllara bir sual gətirir. Pandemiya, karantin bitdikdən sonra həmin dövrdə yazılan cərimələr də silinəcəkmi?

Sonxeber.az-ın məlumatına görə, Milli Məclisin deputatı Razi Nurullayev mövzuya münasibət bildirib.

O, PZR testinin ləğv olunması qərarını alqışladığını söyləyib:

"İndi isə pandemiya dövründə vətəndaşlara tətbiq olunan cərimələrin ləğv olunması məsələsi qaldı. Bunun üçün çalışmalıyıq və çalışacağıq. Biz cəriməni ona görə tətbiq etmişdik ki, vətəndaşlar intizamlı olsunlar. Oldular da. Məqsəd vətəndaşın cəriməsinin hesabına büdcəni doldurmaq deyildi. Buna görə də pandemiya dövründə tətbiq edilən cərimələrin ləğvi vacibdir. Bizdən də kasıb olan ölkələr, məsələn, qonşu Gürcüstan da belə bir addım atıb. Bu səbəbdən, Parlamentin müvafiq komitəsinin məsələni müzakirə etməsini və plenar iclasa çıxarmasını xahiş edirəm.

Bundan əlavə, quru sərhədlər açılsın və gözü yollarda qalan otellər də işlək vəziyyətə gəlib 5-10 nəfər kasıba çörək qazandırsın. Bu mənim dəyişməz mövqeyimdir".

Aysel SƏFƏRZADƏ

Telegramda izləyin