Qadınlar daxili işlər orqanlarında işə götürülmürlər? - AÇIQLAMA

Daxili İşlər Nazirliyi (DİN) qadınların daxili işlər orqanlarına xidmətə qəbul edilməməsi ilə bağlı yayılan məlumatlara aydınlıq gətirib.

DİN Mətbuat Xidmətinin rəisi Ehsan Zahidov Oxu.Az-ın sorğusuna cavab olaraq bildirib ki, son günlər bəzi xəbər saytlarında rəsmi mənbələrə istinad edilmədən xəbərlər paylaşılır ki, qadınların daxili işlər orqanlarında xidmətə qəbulu dayandırılıb:

"İddialar tamamilə əsassızdır və şayiə xarakterlidir. Gender (kişi və qadınların) bərabərliyinin təminatları haqqında Azərbaycan Respublikasının Qanununa uyğun olaraq Daxili İşlər Nazirliyi tərəfindən gender siyasəti daim diqqət mərkəzində saxlanılır və bu sahədə məqsədyönlü və sistemli tədbirlər həyata keçirilir. Qanuna uyğun olaraq Nazirlikdə gender məsələləri üzrə vəzifə də təsis olunub və həmin vəzifəni polis polkovnik-leytenantı rütbəsi daşıyan qadın əməkdaş icra edir.

Hazırda Azərbaycan Respublikasının daxili işlər orqanları şəxsi heyətinin 11 faizini qadın əməkdaşlar təşkil edir ki, bu da bir çox dövlətlərin analoji göstəricilərindən yüksəkdir. Qadın həmkarlarımız polis serjantından polis polkovnikinə qədər xüsusi rütbə daşıyırlar. Bu gün Azərbaycan polisi sıralarında polis nəfərindən tutmuş idarə rəisi kimi xidmət edən qadın əməkdaşlar var. Bundan başqa daxili işlər orqanlarında xidmət edən qadınlar öz kişi həmkarları ilə çiyin-çiyinə ölkəmizdə sabitliyin və ictimai asayişin qorunması sahəsində üzərilərinə düşən vəzifələri böyük əzmlə yerinə yetirirlər".

"Bununla yanaşı daxili işlər orqanlarının sıralarında idmanın cüdo, karate-do, stend və güllə atıcılığı və digər növləri üzrə dünya çempionatlarının və kuboklarının, beynəlxalq turnirlərin və Azərbaycan birinciliyinin qalibləri var. Bu gün qadın polis əməkdaşları respublikanın "ASAN xidmət" mərkəzlərində və daxili işlər orqanlarının istintaq, təhqiqat, pasport-qeydiyyat, statistika, "102 Zəng-Mərkəzi", post-patrul, tibb və digər sahələrində vətəndaşlarımızın xidmətindədirlər.

Məlumat üçün onu da qeyd edim ki, hazırda qadın vətəndaşlarımız daxili işlər orqanlarında xidmətə yalnız Polis Akademiyasında təhsil alaraq deyil, orta təhsili tam başa vurduqdan, həmçinin digər mülki ali təhsil ocaqlarını bitirdikdən sonra DİN tərəfindən əvvəlcədən elan olunan müsabiqələri müvəffəqiyyətlə keçdikləri təqdirdə qəbul olunurlar", - deyə o əlavə edib.

Qeyd edək ki, son günlər Polis Akademiyasına, o cümlədən polis orqanlarında xidmətə qəbulunun dayandırılması ilə bağlı iddialar səslənib.

Qurum isə ilkin məlumatda qadın vətəndaşların Polis Akademiyasına qəbulun dayandırıldığını bildirmişdi.

Telegramda izləyin