Putinin tükürpədici planı üzə çıxdı: Stalinə rəhmət oxutdurur

Rusiya hakimiyyət orqanları genişmiqyaslı işğaldan əvvəl iki milyona qədər ukraynalının zorla deportasiyasını planlaşdırırmış. Bunun üçün 1310 tranzit mərkəzi yaradılıb.

Bu barədə İngiltərənin "Daily Mail" nəşri yazıb. Media orqanı mötəbər mənbələrdən "yüksək səviyyəli sənədlər" aldığını qeyd edib. Qəzet yazır ki, Moskvanın bu qorxunc siyasəti "Sovet İttifaqının ən qaranlıq günlərində yer alan kütləvi deportasiyalarla müqayisə oluna bilər".

O zaman təxminən 1,2 milyon ukraynalı bu "qorxulu" siyasətin bir hissəsi olaraq Rusiyaya, bəziləri Şimali Koreya ilə sərhədə, Sibirin ucqar kəndlərinə və ya hətta Yaponiya yaxınlığındakı Sakit okean adalarına deportasiya edilib.

Məcburi deportasiya "Rusiya düşmənlərini" müəyyən etmək üçün Ukraynanın işğal olunmuş ərazilərində qondarma "süzgəc düşərgələri" sistemi ilə bağlıdır. Bundan əlavə, işğalçılar tərəfindən saxlanılan minlərlə kişi məcburi əməyə cəlb edilir - onlar dağılmış evlərdə partlamamış mina və mərmiləri axtarmağa məcbur edilirlər.

"Daily Mail"in məlumatına görə, Kreml işğal olunmuş torpaqlarda bütün ukraynalıların hökumət və ya hərbçilərlə əlaqəsinin olub-olmadığını yoxlayır, onlardan "süzgəcdən" uğurla keçdikləri barədə sənədlərə malik olmalarını tələb edirlər.

Kreml onların cib telefonlarının bütün məlumatlarını, həmçinin barmaq izlərini və fotoşəkillərini toplayır. Belə məlumatların insanların gələcək hərəkətini izləyə bilən "sifətin tanınması" texnologiyasından istifadə edən Çin tipli müşahidə sisteminə ötürüləcəyi gözlənilir.

Rusiyaya deportasiya edilən ukraynalılara orada qalmaları üçün təzyiq edilir və vətənə qayıtmaq istəyənləri həbslə hədələyirlər. Hər onuncu adam filtrasiya sistemindən "keçmir" və işgəncə ilə tanınan düşərgələr və həbsxanalar şəbəkəsində yoxa çıxır. Belə ki, düşərgədən qaçan bir nəfər 750 məhbus üçün nəzərdə tutulmuş, lakin 3 min insanın olduğu gizli həbsxanada döyüldüyünü və elektrik cərəyanı ilə işgəncələrə məruz qaldığını bildirib.

Bundan əlavə, işğalçılar Donbassın işğal olunmuş ərazilərində 2000-ə yaxın uşağı da uşaq evlərindən götürüblər, yəqin ki, onları Rusiyadakı ailələrə verəcəklər. Maraqlıdır ki, az əvvəl Vladimir Putin Ukraynadan uşaqların övladlığa götürülməsi qaydalarının sadələşdirilməsini barədə sənəd imzalamışdı.

Putinin filtrasiya siyasətinin dəhşətləri keçən həftə Alisa adlı dörd yaşlı qız Mariupoldan təxliyə olunduqdan sonra Ukraynanın cənubundakı Zaporojye şəhərinə gələndə üzə çıxıb. Bu qız 29 saatlıq avtobus səfərindən sonra içərisində paltar və anası Viktoriya Obdinanın qohumlarından uşağına baxmağı xahiş edən məktubu olan bel çantası ilə Zaporojyeyə çatıb. Onlar Mariupoldan 32 km aralıda yerləşən Bezymyannıda "filtrasiya düşərgəsi"ndə bir-birlərindən ayrı düşüblər. Viktoriyanın "cinayəti" onun "Azovstal"ın müdafiəçiləri ilə ünsiyyətdə olması olub.

Sənədlərdən birində 102 495 nəfərin "emal edilməsi" üçün nəzərdə tutulmuş 684 "planlaşdırılmış" tranzit mərkəzi göstərilir. Onlardan 152-si işğaldan üç gün əvvəl, fevralın 21-i səhər saat 6-dan etibarən "qəbula hazır idi". Digər mərkəzlər üçün də başlama tarixləri verilmişdi.

29 aprel tarixli başqa bir sənəddə ukraynalıların saxlanması üçün 1310 "yer" qeyd olunub. Göstərilir ki, 496 mərkəzdə 33 474 nəfər, o cümlədən 11 637 uşaq saxlanılıb. Ukrayna Ombudsmanı Lyudmila Denisova bildirib ki, bu sənədlər deportasiyanın planlaşdırıldığını sübut edir.

Bildiyimiz kimi, filtrasiya düşərgələrindən İkinci Dünya Müharibəsindən sonra Stalinin cəza maşını faşistlərə əsir düşmüş hərbi əsirləri və SSRİ vətəndaşlarını yoxlamaq üçün edirdi. "İdeoloji təmizliyə görə" imtahandan keçməyən 300 minə yaxın insan sürgünə göndərilmişdi. Amma bəzi ekspertlər hesab edirlər ki, Ukraynanın Mariupol şəhəri sakinlərinin Uzaq Şərqə deportasiyası Rusiyanın daxildən dağılmasına səbəb ola bilər.

Telegramda izləyin