Azərbaycan Avropa bazarına nə qədər qaz çatdırmağı proqnozlaşdırır?

"Azərbaycanla Avropa İttifaqı (Aİ) arasındakı münasibətlər strateji tərəfdaşlıq münasibətləridir. Fundamental məsələlərdə bizim mövqelərimiz üst-üstə düşür və Azərbaycan-Aİ münasibətlərinin inkişafının çox geniş perspektivləri var".

Bu sözləri Sonxeber.az-a Milli Məclisin deputatı, siyasi elmlər doktoru, professor Elman Nəsirov deyib.

Onun sözlərinə görə, xüsusilə enerji təhlükəsizliyi, nəqliyyat təhlükəsizliyi kimi sahələrdə Bakı-Brüssel münasibətləri çox sürətlə inkişaf etməkdədir:

"Rusiya-Ukrayna böhranı fonunda Aİ ölkələrinin enerji təhlükəsizliyi məsələləri xüsusi əhəmiyyət kəsb etməkdədir. Nəzərə alaq ki, il ərzində Aİ ölkələrinin beş yüz milyard kub.m qaza tələbatı var.

Bu nöqteyi-nəzərdən Aİ Azərbaycana yeni alternativ enerji mənbəyi kimi baxır. Ötən il Azərbaycan Aİ ölkələrinə 8.2 milyard kub.m qaz satıb. Bu il 9 milyarddan, gələn il isə 11 milyard kub.m-dən artıq Azərbaycan qazının Avropa bazarına çatdırılması planlaşdırılır.

Bu baxımdan "Cənub Qaz Dəhlizi" layihəsi Avropanın meqa layihəsidir, onun da təminatcısı Azərbaycan dövlətidir.

Qeyd edim ki, 27 Aİ ölkələrinin doqquzu ilə Azərbaycanın strateji tərəfdaşlığı haqqında müvafiq sənədlər imzalanıb.

Eyni zamanda, dünyanın çox mühüm iqtisadi güc mərkəzi ilə Azərbaycan arasında strateji tərəfdaşlıqla bağlı sazişin imzalanması yaxın perspektivlərin işidir. Bu istiqamətdə əksər məsələlərdə artıq ortaq məxrəc əldə edilib və bu sənədin imzalanması ilə Azərbaycan-Aİ münasibətlərində yeni səhifə açılacaq, bu münasibətlər keyfiyyətcə yeni müstəviyə qalxacaq.

Bizim münasibətlərimiz regional təhlükəsizlik məsələlərində də öz əksini tapır. Azərbaycan Prezidenti cənab İlham Əliyevin qeyd etdiyi kimi, ATƏT-in Minsk qrupunun, demək olar ki, de-fakto və de-yure fəaliyyəti dayanıb.

İndi Azərbaycan dövləti postmüharibə dövründə həllini gözləyən məsələlərdə Aİ-nin fəal rolunu görür və qiymətləndirir".

Millət vəkilinin sözlərinə görə, təsadüfi deyil ki, 14 dekabr 2021-ci il və 6 aprel 2022-ci il tarixlərində məhz Aİ Şurasının prezidenti Şarl Mişelin təşəbbüsü və vasitəçiliyi ilə Azərbaycan və Ermənistan siyasi liderlərinin görüşü əldə edilib və bu görüşdə də bir sıra fundamental məsələlərlə bağlı irəliyə doğru addımlar atılıb:
"Beləliklə, həm siyasi dialoq, həm iqdisadi ticarət əlaqələri, həm də enerji və nəqliyyat təhlükəsizliyi kimi mühüm sferalarda Azərbaycan-Aİ münasibətləri sürətlə inkişaf edir və bu, hər iki tərəfin maraqlarına tamamilə cavab verir".

ZAİRA AKİFQIZI

Telegramda izləyin