Mirşahin ölkədəki bəzi "YouTube" kanallarının fəaliyyətini SƏRT TƏNQİD ETDİ

2014-cü ildə Kəlbəcərdə əsir götürülən və 6 il sonra Azərbaycanın igid oğullarının qanı bahasına azadlığa çıxan Şahbaz Quliyev aksiya keçirib.

Sonxeber.az-ın məlumatına görə, Bakıda metronun "İçərişəhər" stansiyası yaxınlığında jurnalistlər qarşısında dövlət qurumlarından şikayət edən Şahbaz Quliyevin bu addımına, eyni zamanda Azərbaycanda bir sıra "YouTube" kanallarında bu şəxsin fikirlərinin birtərəfli şəkildə açıqlanması üçün şəraitin yaradılmasına jurnalist Mirşahin Ağayev sərt münasibət bildirib.

O söyləyib ki, həmin əsir azad şəkildə dövlət qurumları qarşısında aksiya keçirməklə hələ sonadək anlamadığı pisliyi bu dəfə Azərbaycana qarşı şüurlu şəkildə etdiyini dərk etmirsə, bu, artıq hüquq mühafizə orqanlarının diqqətində olmalıdır:

"Əsir Şahbazın Ermənistanın kütləvi imformasiya vasitələrinə verdiyi anti-Azərbaycan ruhunda müsahibələr böyük ajiotaja səbəb olmurdu. Çünki əsirlikdə idi, canı üçün qorxurdu. Bu düşüncə trafareti hər yerdə var. Amma Azərbaycanda, "YouTube" kanalında öz dövlətini, onun beynəlxalq nüfuzunu hədəfə alan tərzdə çıxış etməsi artıq başqa məna verir.

Bu şəxsin müsahibəsini Ermənistan telekanalları geninə-boluna istifadə edir. Öz dillərindən təqdim edirlər ki, "Gördünüz? Adam özü etiraf edir ki, diversantdır, hansısa kabinetdən Kəlbəcərə xüsusi tapşırıqla yola salıblar"".

Aysel SƏFƏRZADƏ

Telegramda izləyin