Azərbaycanda övladını intihar həddinə çatdıran valideynlər niyə cəzalandırılmır? - ARAŞDIRMA

Son günlər imtahanda aşağı bal toplayıb valideynlərindən psixoloji şiddət gördüyünə görə intihar edən məktəblilərin sayı artıb. Bəs niyə övladını intihar həddinə çatdıran heç bir valideyn indiyədək cəzalandırılmayıb? Azərbaycanın Cinayət Məcəlləsinin 125-ci maddəsi ("Özünü öldürmə həddinə çatdırma") necə müəyyən olunur?

Sonxeber.az bununla bağlı araşdırma edib.

Azərbaycan Uşaqlar Birliyinin rəhbəri Kəmalə Ağazadə bildirib ki, intihar həddinə çatdırma qəliz məsələdir, "Ailə məsələsinə qarışmaq olmaz" düşüncəsi ilə qonşular şahidlik etmədiyinə görə bu cinayətlər cəzasız qalır:

"Biz bunu sübuta yetirə bilmədiyimiz üçün "Özünü öldürmə həddinə çatdırma" maddəsi ilə çox az adam məsuliyyətə cəlb olunur. Mənim təcrübəmdə belə bir hadisə olmuşdu. Sığınacağa bir qız yerləşdirmişdilər. O qız şahid qismində bildirmişdi ki, ana və bacısının intihar etməsinə səbəb atasının davamlı olaraq şiddət göstərməsi olub. Həmin ataya 4 il yarım iş verdilər. O maddə ilə həbsxanada yatıb çıxandan sonra oğluna təsir göstərib və şahidlik edən həmin qızını öldürtdürüb.

Hər şeyin üstünə "namus" adı qoyub intihar həddinə çatdırmalar çoxdur.

Mən hüquq mühafizə orqanlarının apardığı işin nə qədər ağır olduğunu anlayıram. Əlbəttə, ölüm həddinə çatdırma ilə bağlı dəlillər varsa, kimliyindən asılı olmadan, həmin şəxs mütləq həbs olunmalıdır. İntihar həddinə çatdırma çox qəliz maddədir. Bu, görüntülər və şahidlər vasitəsilə sübuta yetirilə bilər. Amma heç bir qonşu şahidlik etmir. Düşünürlər kI, bu, ailə məsələsidir, qarışmaq olmaz".

Deputat Jalə Əliyeva bildirib ki, belə hallar eşitsək də, bununla bağlı kifayət qədər sübut olmur:

"Əgər valideynlər həbs olunmursa, deməli, cinayət tərkibi müəyyənləşdirilməyib. Hüquq mühafizə orqanları uşağın həqiqətən danlandığına görə intihar edib-etmədiyini müəyyənləşdirir. Eşidə bilərik ki, valideynin göstərdiyi psixoloji təzyiqə görə uşaq intihar edib. Amma səbəb bu olmaya da bilər. Hər bir intihar hadisəsi araşdırılır və səbəbkar cəzalandırılır. Heç bir valideyn uşağının intiharına səbəb olmaq istəməz. Bu maddə ilə cəzalanan olmayıbsa, deməli həmin valideynin cinayəti təsdiqlənməyib".

Vəkil Orxan Kəngərli bildirib ki, Azərbaycanda bu maddə ilə həbs olunan insanlar var, həbs olunmayanlar isə cinayətin sübuta yetirilmədiyi üçün həbs olunmurlar:

İntihar həddinə çatdırmanın sübutu üçün kifayət qədər əsaslar olmalıdır. Uşaq öz beynində "valideyn məni döyəcək, söyəcək" kimi fikirlər formalaşdırırsa, real əsaslar olmadan intihar edirsə, valideyni intihar həddinə çatdırma ilə həbs etmək olmaz. Azərbaycanda bu maddə ilə həbs olunan insanlar var. Həbs olunmayanlar isə cinayətin sübuta yetirilmədiyi üçün həbs olunmurlar".

Şəbnəm Lətifi

Telegramda izləyin