İranda növbəti müəmmalı insident: raket mühəndisi naməlum şəraitdə həlak olub...

İran mühəndisinin qətli İranın hərbi-sənaye kompleksi ilə bağlı olan üçüncü "müəmmalı" hadisədir

İranın tanınmış raket mühəndisi, doktor Əyyub Entezari naməlum şəraitdə həlak olub.

Bu barədə İran KİV-ləri məlumat yayıb.

Dərc edilən nekroloqa əsasən, həlak olan mühəndis İranın müdafiə nazirliyinə tabe olan Aerokosmik Sənayesi Təşkilatının (Aerospace Industries Orqanization) zavodu nəzdində Yezd şəhərində yerləşən elmi-tədqiqat institutunda işləyib.

Bu təşkilat İranın kosmik proqramında həlledici oyunçudur. Bundan başqa, onun İranın "Şahab" ballistik raketlərinin işlənib hazırlanması və istehsalına birbaşa aidiyyəti var.

Aerokosmik texnika sahəsində aparıcı mütəxəssislərdən olan Əyyub Entezari sağlığında döyüş PUA-ları, kiçik və orta mənzilli raketlərin işlənib hazırlanması ilə məşğul olub.

İslam İnqilabı Keşikçiləri Korpusu (İİKK) qüvvələri ilə əlaqəli olan "Telegram-kanal" məlumat verib ki, doktor Entezari "qida zəhərlənməsindən" vəfat edib.

İran KİV-lərinin bəzi məlumatlarında doktor Əyyub Entezarinin ölümü və mümkün qətlində İsrailin "Mossad" kəşfiyyatının adı hallanır.

Lakin İranın rəsmi şəxsləri tərəfindən İsrail alimin qətlində ittiham edilməyib.

İran mühəndisinin ölümü İranın hərbi-sənaye kompleksi ilə bağlı olan üçüncü "müəmmalı" hadisədir.

Əvvəllər məlumat verildiyi kimi, mayın 22-də Tehranda naməlum şəxslər İran İnqilabı Keşikçiləri Korpusunun polkovniki Səyyad Xodai yaxın məsafədən güllələnib. O, İnqilabi qvardiyanın 840-cı "Qüds" bölməsində xidmət edib, dünyanın müxtəlif yerlərində israillilərə zərbələr endirmək üçün mülki adamların seçilməsi və cəlb olunmasına, habelə bu agentlərlə təmaslara görə cavabdeh olub.

Daha sonra "New York Times" qəzeti yazıb ki, guya, İsrail Amerika Birləşmiş Ştatlarını öz xüsusi xidmət orqanlarının polkovnik Xodainin qətlində əli olması barədə məlumatlandırıb.

Bəzi məlumatlarda Xodainin qətlində İran KİV-ləri İsraili günahkar bilib, bunu da İran liderləri dəstəkləyib. İranda dərhal İsrail və onun vətəndaşlarının ünvanına təhdidlər artmağa başlayıb, həm də bu təhdidlər o qədər çox olub ki, İsrail XİN və DİN israilliləri Türkiyəyə səfərdən çəkinməyi tövsiyə edib.

Mayın 30-da bu qətldən bir həftə sonra Tehranın şimalında yerləşən Karacda 840-cı "Qüds" bölməsinin daha bir zabiti, Səyyad Xodainin yaxın dostu polkovnik Əli İsmayılzadə öz evinin damından (bəzi məlumata görə, balkonundan) yıxılıb.

İran rejiminə müxalif olan "Britaniya- İran" telekanalının məlumatına görə, polkovnik Səyyad Xodainin qətlindən sonra İslam İnqilabı Keşikçiləri Korpusu "Qüds" bölməsinin fəaliyyəti ilə əlaqədar məxfi məlumatların sızmasını araşdırıb.

Cacusluqda şübhəli bilinənlər arasında İsmayılzadə də oub, ona görə də İİKK intihar görüntüsü yaradaraq onu aradan götürməyə qərar verib (guya polkovnikin mənzilində ölümqabağı məktub aşkar edilib).

İsmayılzadənin ailəsinə izah edilib ki, o, həyat yoldaşı ilə ayrılandan sonra səhhətində yaranan psixoloji problemlər ucbatından intihar edib.

Telegramda izləyin