"Kino dövlətdən asılı yox, müstəqil olmalıdır" - Rəşad Qasımov

2 Avqust Milli kino günüdür. Azərbaycan kinosunun bugünki vəziyyətinə baxdıqda keyfiyyətli kinolara çox az rast gəlirik. Azərbaycan konosunun inkişafına mane olan səbəblər nədir?
Bununla bağlı Sonxeber.az-a açıqlama verən kinoprodüser, Azərbaycan Dövlət Film Fondunun kinoarxiv şöbəsinin müdiri Rəşad Qasımov bildirib ki, Azərbaycan kinosunun inkişaf etdirmək üçün kinonu dövlət maliyyələşdirməməlidir. Sağlam kino mühitinin formalaşması üçün müstəqil kino olmalıdır:

"Kino böyük bir istehsalat prosesidir və Azərbaycanda kino industriyası formalaşmalıdır. Kinonu təkcə dövlət maliyyələşdirməməlidir. Kino daha geniş əhatəli olmalıdır. Bunu üçün də ilk növbədə müstəqil kinonu inkişaf etdirmək lazımdır. Çəkiliş prosesində dövlətin müəyyən faiz miqdarında maliyyə dəstəyi ola bilər, amma sağlam kino mühitinin formalaşması üçün müstəqil kino olmalıdır. Bu problem həll olandan sonra vəziyyət dəyişəcək.
Hazırda Azərbaycanda bütün filmlər dövlət hesabına maliyyələşir. Müxtəlif janrlarda filmlər olur və kinoteatrlarda nümayiş etdirilir. Amma daha ciddi kinolar dövlət sifarişi ilə çəkilir. Dövlət sifarişi ilə çəkilən tammetrajlı filmlərin sayı ildə maksimum 1-2 olur.
İki gün əvvəl Türkiyənin Kinematoqrafiya Komitəsinin sədri Erkin Yılmaz bəylə görüşdük. O, hazırda Türkiyə kinosunun inkişafından söz açarkən qeyd etdi ki, onların maliyyə dəstəyi ayırdıqları yalnız Türkiyəni dünyada təmsil edən festival filmləridir. Amma daxili kino industriyanın inkişafı yerli müstəqil studiyalardan asılıdır. Ümid edirəm ki, bizdə də müstəqil kino inkişaf edəcək və rəqabətli kinemotoqrafiya yaranacaq. Rəqabət olan yerdə həmişə inkişaf olur".
Şəbnəm Lətifi

Telegramda izləyin

instagramda izləyin