Kəmalə Ağazadə həssas ailələrin məlumat bazasının yaradılmasını təklif edib

Azərbaycan Uşaqlar Birliyi- Uşaq Sığınacağı Mərkəzinin rəhbəri Kəmalə Ağazadə həssas ailələrin məlumat bazasının yaradılmasını təklif edib.
O, Sonxeber.az-a açıqlamasında bildirib ki, bu proqramı Özbəkistanda görüb və Azərbaycanda da yaradılmasının tərəfdarıdır:
"Mən bu təklifi verirəm. Çünki buna ehtiyac var. Hər hansı ailədə münaqişə olubsa, o zaman bu ailələr nəzarətə götürülür. Bu yaxınlarda qeyri-hökumət təşkilatının və dövlət qurumlarının nümayəndələri, Daxili İşlərin İnsan Alverinə qarşı Mübarizə Baş İdarəsi, Sosial Xidmətlər Agentliyi, Miqrasiya Xidməti əməkdaşları ilə Özbəkistana səfər etdik və orda həssas ailələr, insan alveri, zoraklıq qurbanlarının reinteqrasiya proqramları ilə tanış olduq. Mənim diqqətimi çəkən çox maraqlı proqram var idi. Bu prezidentin təsis etdiyi "Dəmir dəftər" adlanan proqram idi. "Dəmir dəftər" pandemiya dövründə bir çox müəssisələr bağlandığından, işsizliyin sayı artdığından ailələrin sosial durumu ağırlaşdığından yaradılıb. Onların sistemləri bizdən bir qədər fərqlidir. Bizdə icra hakimiyyəti, bələdiyyə, onlarda məhəllə var və icma formasında fəaliyyət göstərir. Buna dövlət nəzarət edir. "Dəmir dəftər"in məqsədi sosial durumu ağır olan ailələrin sistemini yaratmaq idi. Sistem yaradılanda ailə başçısını itirən ailələr siyahıya salınır. İkinci hissəsi tək yaşayan ahıl insanlara sosial dəstəyin göstərilməsini, eləcə də himayəsində azyaşlı uşaqları olan ailələri nəzərdə tutmuşdu. Bu icmalarda bu sistem formalaşdı və çox yaxşı effekti görüldü. Bu məlumat bazasının əsasında hər rayon üzrə istiqamətləndirilmələr həyata keçirildi. İstiqamətləndirmələr həm hüquq mühafizə orqanları, həm soial xidmətləri nəzərdə tutur. Təhsildən yayınan uşaqlar müəyyən olunur , heç bir peşə bacarığı olmayan insanlar müəyyən olunur. Ailə başçısı olmayan qadınlar kurslara yönləndirilir və peşə sahibi olur. "Dəmir dəftər" gənclər dəftəri və qadın dəftəri olmaqla iki yerə bölünür. Yaradılmasının məqsədi sosial rifahın qaldırılması, hüquqların qorunması istiqamətindədir. Mənim də təklif etdiyim buna bənzər modeldir".

Şəbnəm Lətifi

Telegramda izləyin