"Azərbaycan müəlliminin peşəkarlığı o qədər yüksək olmalıdır ki, kadrları lazımi səviyyədə hazırlaya bilsin" - Təhsil eksperti

Bu gün 5 oktyabr Beynəlxalq Müəllimlər Günüdür. Müəllim olmaq istəyən namizədlər çox keşməkeşli yollardan keçməlidirlər. Belə ki, əvvəlcə MİQ, daha sonra diaqnostika və 5 ildən bir sertifikasiya imtahanları verirlər. Bəziləri bunu təhsilin keyfiyyəti üçün zəruri saysalar da, bəziləri təhsilverənin də təhsilalan kimi tez-tez imtahan olunmasını onu nüfuzdan saldığını düşünürlər.

Təhsil eksperti Elşən Qafarov Sonxeber.az-a bildirib ki, bu imtahanlar dövlətin inkişaf konsepsiyasına uyğundur. Təhsilimizi daha yüksək görmək üçün Azərbaycan müəlliminin peşəkarlığı vaxtaşırı yoxlanılmalı və ehtiyac duyulan sahə üzrə əlavə təhsilə cəlb olunmalıdır:
"Əvvəla Sonxeber.az vasitəsi ilə bütün müəllimləri təbrik edirəm. Onlara bu şərəfli yolda, gərgin fəaliyyətdə uğurlar arzu edirəm. İstənilən ölkənin inkişafı təhsilinin inkişafı ilə bağlıdır. Təhsilin əsas vəzifəsi şəxsiyyət və vətəndaş, ölkəyə insan kapitalı yetişdirməkdir. Bu sahədə müəllimlərimizin zəhməti böyükdür. Azərbaycan Respublikası beynəlxalq səviyyədə rəqabət aparacaq dövlət səviyyəsinə qalxıbsa, bu ancaq kadrların hesabına olub. Ona görə də Azərbaycan müəlliminin peşəkarlığı o qədər yüksək olmalıdır ki, kadrları lazımi səviyyədə hazırlaya bilsin. Müəllimlərin sertifikasiya və diaqnostika olunması kiminsə istəyi ilə deyil, ümummilli məsələdir və dövlətin inkişaf konsepsiyasına uyğundur. Düşünürəm ki, təhsilimizi daha yüksək görmək üçün Azərbaycan müəlliminin peşəkarlığı vaxtaşırı yoxlanılmalı və ehtiyac duyulan sahə üzrə əlavə təhsilə cəlb olunmalıdır. Müəllimlər də bunu normal qəbul etməyi bacarmalıdırlar. Biz daha güclü, inkişaf etmiş Azərbaycan istəyiriksə, təhsil sistemimiz daha güclü olmalıdır. Təhsil sisteminin güclü olması üçün isə müəllimlərimizin peşəkarlığı ilk sırada durur. Bu peşəkarlığın müəyyən edilməsi üçün isə müəllimlərin sertifaktlaşdırılması, attestasiyadan keçirilməsi, müəllimlərin ehtiyaclarını öyrənmək bu günün tələbidir. Düşünmürəm ki, bu, müəllimi nüfuzdan salır. Əksinə, Azərbaycan müəllimi nə qədər peşəkar olarsa, nüfuzu bir o qədər yüksək olacaq".

Şəbnəm Lətifi

Telegramda izləyin