"18 oktyabr xalqımızın tarixə şərəf, qürur və iftixar hissilə yazdığı müqəddəs bir gündür" - DEPUTAT

"Bu gün Azərbaycanın müstəqilliyini bərpa etməsindən 31 il ötür. 18 oktyabr xalqımızın tarixə şərəf, qürur və iftixar hissilə yazdığı müqəddəs bir gündür".

Bu sözləri Sonxeber.az-a danışan deputat İltizam Yusifov deyib.

Deputat qeyd edib ki, Azərbaycan ilk müstəqilliyini 1918-ci ildə qazanıb:

"Amma təəssüf ki, müxtəlif səbəblərdən müstəqilliyimizi davamlı edə bilmədik. Növbəti dəfə müstəqilliyimizi 90-cı illərin əvvəllərində qazandıq və bu günə qədər də qoruyub saxlayırıq. Sözsüz ki, müstəqillik bütün xalqlar üçün ən böyük arzudur. Onu qazanmaq və qoruyub saxlamaq çox çətindir. Biz bu illər ərzində bu çətinliyin öhdəsindən layiqincə gəlirik. Müstəqillik verilmir, qazanılır. Biz müstəqilliyimizi qazanmışıq".

Deputat qeyd edib ki, 18 oktyabr 1991-ci il tarixində qəbul edilmiş Müstəqillik Aktı dövlətin bütün dünyada tanınmasında həlledici rol oynadı:

"Bundan sonra Azərbaycan dünyanın nəhəng dövlətlərilə ikitərəfli, bərabərhüquqlu, diplomatik əlaqələr qurmağa başladı, nüfuzlu beynəlxalq təşkilatlara üzv oldu. Parçalanma təhlükəsi ilə üz-üzə dayanan Azərbaycanın dövlətçilik tarixində Ulu Öndər Heydər Əliyevin xalqın təkidi ilə siyasi hakimiyyətə qayıdışından sonra yeni bir mərhələ başlandı. Ümummilli lider Heydər Əliyev bu dövləti əbədi, sarsılmaz və qüdrətli dövlətə çevirmək üçün bütün lazımi addımları atdı, Azərbaycanın müstəqilliyini dünya müstəvisində reallığa çevirdi. Böyük şəxsiyyət olan Ulu Öndər Heydər Əliyev öz dərin zəkası, iti ağlı və mətin iradəsi ilə Azərbaycanımızı yüksəltdi, qorudu, müstəqilliyini yaşatdı və əbədiləşdirdi.

Bu gün əminliklə deyə bilərik ki, Ali Baş Komandan İlham Əliyev Ulu Öndər Heydər Əliyevin siyasi kursunu layiqincə davam etdirir. Onun rəhbərliyi ilə müstəqil Azərbaycan bütövləşərək daha da möhkəmlənib. Ali Baş Komandanın rəhbərliyi ilə rəşadətli Azərbaycan ordusu 30 illik həsrətə son qoyaraq, işğal altında olan torpaqları düşmən tapdağından azad etdi. 44 günlük Vətən müharibəsi Azərbaycanın müstəqillik salnaməsinin ən şanlı səhifəsidir. Bu gün Azərbaycan Respublikası cənab İlham Əliyevin zəhmətləri sayəsində dünyanın hesablaşdığı, yeni reallıqların müəllifi kimi qüdrətli dövlətlərdən birinə çevrilib. İki ildir ki, biz sözün əsl mənasında müstəqil, ərazi bütövlüyünü bərpa edən bütöv, azad, şanlı Azərbaycanın Müstəqilliyini qeyd edirik. Artıq bütün dünya bilir ki, müstəqilliyimiz əbədi və sarsılmazdır".

Aysel Yusifqızı

Telegramda izləyin