Yeni ata olanlara MÜJDƏ - Artıq ödəniş olunması təklif olunur

Yenicə ata olan şəxslərə verilən 14 günlük ödənişsiz məzuniyyətin ödənişli olması təklif olunur.

Maraqlıdır ki, qanunvericilikdə bu hüquq necə tənzimlənir və hansı maddədə öz əksini tapır? Maraqlıdır ki, belə qanunun olmasından bir çox insan xəbərsizdir.

Məsələ ilə bağlı hüquqşünas Əkrəm Həsənov Ednews-a açıqlamasında bildirib ki , Əmək Məcəlləsinin 130-cu maddəsinin B bəndində qeyd olunub ki, həyat yoldaşları doğuşla əlaqadar məzuniyyətdə olan kişilərə 14 təqvim gününə qədər ödənişsiz məzuniyyət verilsin. Lakin bu zaman kişilərə heç bir pul ödənilmir.

Hazırda isə qanunun ödənişli əsaslarla qüvvəyə minməsi üçün Milli Məclisdə məsələ qaldırılıb. Hüquqşünas da bu işlə bağlı mühüm işlərə imza atmağın vacibliyini vurğulayıb.

"Düşünürəm ki, hökümət bu qanununla məşğul olmalıdır".

Sosioloq Rəşad Əsgərov isə qeyd edib ki, bununla bağlı təklif hətta 5 il bundan öncə qaldırılıb.

"Bu məsələni Milli Məclisdəki deputatlar hər dəfə ancaq müzakirə edirlər. Amma bunun həlli üçün müzakirə kifayət etmir. Parlament bu məsələni müəyyən qurumlarla razılaşdırdıqdan sonra qərar qəbul edə bilər. Burada ciddi iqtisadi yük var. Avropa ölkələrində bu qanun mövcuddur. Bizdə bu qanunun qəbul olunacağı gözlənilmir. 5 il əvvəl də bu mövzu müzakirələyə çıxarılmışdı, lakin heç bir nəticə vermədi".

O, həmçinin qeyd edib ki, bu məsələ də eyni ilə uşaq pulunun verilib verilməməsi kimi uzun müzakirələrə məruz qalacaq.

" Bunların hər ikisi də illərdir ki, danışılan, müzakirə olunan amma nəticəsi olmayan məsələlərdir. Hər il bunun müzakirəsi aparılır ancaq ortada heç bir nəticə yoxdur".

Telegramda izləyin