ABŞ və Çin rəsmiləri Sürixdə görüşəcəklər

ABŞ-ın maliyyə naziri Janet Yellen və Çinin xarici ticarət və beynəlxalq iqtisadi əlaqələrdən məsul baş nazirinin müavini Liu Hi bu həftə İsveçrənin Sürix şəhərində görüşəcəklər.

Sonxeber.az xəbər verir ki, ABŞ Maliyyə Nazirliyi və Çin Ticarət Nazirliyi eyni vaxtda verdiyi açıqlamalarda Davosda keçiriləcək Dünya İqtisadi Forumunda iştirak etmək üçün İsveçrədə olan iki rəsminin görüşəcəyini təsdiqləyib.

Vaşinqtondan verilən açıqlamada bildirilib ki, Yellen və Liu makroiqtisadi inkişaflar və digər iqtisadi məsələlər, ABŞ və Çin arasında əlaqələrin dərinləşdirilməsi ilə bağlı fikir mübadiləsi aparacaqlar.

Çin Ticarət Nazirliyi də görüşün iki ölkə arasında makroiqtisadi və maliyyə siyasətlərinin koordinasiyasını gücləndirəcəyini vurğulayıb.

Görüş zamanı iki məmurun qarşılıqlı gömrük tarifləri məsələlərini həll edib-etməyəcəyi barədə məlumat paylaşılmayıb.

Görüş ABŞ katibi Yellenin 2020-ci ildə vəzifəyə gəldikdən sonra Liu ilə ilk təkbətək görüşü olacaq. Rəsmilər bundan əvvəl üç dəfə onlayn görüş keçiriblər.

Şəbnəm Lətifi

Telegramda izləyin