Trampın atəşkəs bəyanatından sonra Ukraynada enerji obyektlərinə hücumlar davam edir

ABŞ Prezidenti Donald Trampın Rusiya və Ukrayna arasında enerji obyektlərinə qarşı hücumların dayandırılması ilə bağlı razılaşmanın əldə olunduğunu açıqlamasından sonra Kiyev Moskvanın bu təşəbbüsə əməl etmədiyini bildirir.

Sonxeber.az Reuters-ə istinadən xəbər verir ki, Ukrayna Prezidenti Vladimir Zelenski ABŞ-ın təşəbbüsünü dəstəklədiklərini, lakin razılaşmanın həyata keçirilməsi ilə bağlı Vaşinqtondan əlavə məlumat gözlədiklərini açıqlayıb.

Zelenski bildirib ki, Ukrayna Rusiya enerji obyektlərinə qarşı hücumları dayandırmağa hazırdır. Bunun üçün Moskva da Ukraynanın enerji infrastrukturuna zərbələri dayandırmalıdır.

Ukrayna rəhbərinin sözlərinə görə, son bir həftə ərzində ölkənin elektrik enerjisi istehsalı obyektlərinə 200-dən çox hücum, neft və qaz infrastrukturuna isə 17 zərbə qeydə alınıb.

"Reuters" yazır ki, Trampın bəyanatından sonra Rusiya tərəfi atəşkəs təşəbbüsünə dair mövqeyini aydın şəkildə təsdiqləməyib. Ukrayna isə enerji obyektlərinə hücumların davam etdiyini bildirir.

Beləliklə, enerji infrastrukturuna qarşılıqlı hücumların dayandırılması ilə bağlı təşəbbüsün real atəşkəsə çevrilib-çevrilməyəcəyi hələlik qeyri-müəyyən olaraq qalır.

Telegramda izləyin