"Rent a Car"dan icarəyə maşın götürdü, fındıq oğurladı - Həbsxanaya getdi

"Rent a Car" şirkətindən icarəyə götürdüyü "Chevrolet Cruze" markalı avtomobillə xalasının qonşusunun evindən fındıq oğurlayan şəxslə bağlı məhkəmə qərar verib.

Qaynarinfo-nun məlumatına görə, 2000-ci ildə Balakən rayonu, Qazma kəndində anadan olan Zabil (şərti) həyat yoldaşı və uşaqları ilə birlikdə 2018-ci ildən Bakıda yaşayıb və burada çalışıb. O, "Rent a Car" şirkətindən "Chevrolet Cruze" markalı avtomobil icarəyə götürərək, həyat yoldaşı və azyaşlı uşağı ilə birlikdə doğulduğu Qazma kəndində yaşayan nənəsini və əmisi ziyarətə gedib.

O, rayonda xalası Rənaya da baş çəkmək istəyib və hər şey bundan sonra başlayıb. Belə ki, xalasıgilə gəldikdən sonra qonşu həyətin qapısında qıfıl olduğunu görüb, həmin evdə heç kimin olmadığını başa düşüb və oradan oğurluq etmək qərarına gəlib. Evin mətbəxinin pəncərəsindən içəri daxil olarkən yerə sərilmiş vəziyyətdə fındıq olduğunu görüb. O, fındığı 3 sintetik kisəyə doldurub, mətbəxdə gördüyü "Samsung S4" markalı telefonu və üzərində dollar şəkli olan kassanı (içərisində 20 manatdan çox qəpiklər olub) götürüb.

Zabil oğurladığı fındığı icarəyə götürdüyü avtomobilə yükləyib və Balakən şəhər bazarına yollanıb. Bazarda 150 kq olan fındığı satıb. Daha sonra ərazidəki yanacaqdoldurma məntəqəsində evdən oğurladığı qəpiklərlə maşına benzin vurub. "Samsung S4" markalı telefonu isə Bakı şəhərinə çatdıqdan iki gün sonra "Neftçilər" metrostansiyasının yanındakı telefon mağazalarının birinə 25 manat pula satıb.

Məhkəmə onunla bağlı yanvarın 11-də qərar verib. Qərara əsasən, təqsirləndirilən şəxs 1 il 5 ay 26 gün müddətin azadlıqdan məhrum edilib.

Telegramda izləyin