Yunanıstanın xəbər verilişinin belə başlanması türkləri kövrəltdi - VİDEO

Yunan Dövlət Televiziyasında səhər xəbərlərini "Ben seni sevduğumi" mahnısı ilə və Türkiyədəki zəlzələ barədə məlumat verməklə başlayıblar.

BiG.AZ xəbər verir ki, sosial şəbəkələrdə yayılan həmin kadrlar türklər tərəfindən minnətdarlıqla qarşılanıb.

Qeyd edək ki, Türkiyə Yunanıstan münasibətləri Yunanıstanın 1821-ci ildə Osmanlıdan müstəqillik qazandığı dövrdən bəri qarşılıqlı düşmənçilik və qısamüddətli barışıqlarla müşayiət olunur. O vaxtdan bəri iki ölkə dörd böyük müharibədə bir-biri ilə toqquşub: Osmanlı-Yunan müharibəsi (1897), Birinci Balkan müharibəsi (1912-1913), Birinci Dünya müharibəsi (1914-1918) və İkinci Yunan-Türk müharibəsi (1919–1922). Ölkələr arasındakı dövlət sərhədinin uzunluğu 192 km-dir.

2022-ci ilin yazından etibarən Türkiyə və Yunanıstan arasında siyasi münasibətlər getdikcə gərginləşməyə başlayıb. İki ölkəni üz-üzə qoyan səbəblərdən biri "12 ada"dır.

Belə ki, Egey dənizinin cənub-şərqində "12 ada" olaraq bilinən, əslində sayı 12-dən çox olan bu adalar 20-ci əsrin əvvəllərinə qədər Osmanlı imperiyasına məxsus olub. Türkiyə-İtaliya müharibəsində imzalanan müqviləyə əsasən, Osmanlı əsgərlərini Liviyadan çıxaracaq, italyanlar isə bunun müqabilində işğal etdikləri 12 adanı geri qaytaracaqdılar. Daha sonra 12 adanın statusu İkinci Dünya Müharibəsinin sonunda qalib tərəf olaraq Yunanıstana verildi. Yarım əsrdən çoxdur ki, Egey adalarında Türkiyə ilə Yunanıstan arasında ada qalmaqalı davam edir. Gərginliyin digər səbəbi Yunanıstanın Şərqi Egey adalarında silah yerləşdirməsidir ki, bu da Türkiyənin sərt reaksiyasına gətirib çıxarıb.

Telegramda izləyin