ABŞ İsrailin yeni qeyri-qanuni məskunlaşma planını tənqid edib

ABŞ İsrailin işğal altındakı İordan çayının qərb sahilində əlavə yaşayış məntəqələri açmaq planını dərin problem adlandırıb.

Sonxeber.az xəbər verir ki, ABŞ Dövlət Departamentinin sözçüsü Ned Prays gündəlik mətbuat konfransında açıqlama verib.

"İsrailin minlərlə yaşayış məntəqəsini irəlilədəcəyi barədə açıqlaması bizi dərindən narahat edi.Əvvəlki administrasiyalar kimi, biz də tərəflər arasında etimadı sarsıdan, gərginliyi artıran və danışıqlar yolu ilə iki dövlətli həll imkanını sarsıdan bu birtərəfli tədbirlərə qəti şəkildə qarşıyıq", - deyə Prays bildirib.

Prays İsrail hökumətinin İordan çayının qərb sahilində qanuniləşdirəcəyini açıqladığı 9 yaşayış məntəqəsinin də İsrail qanunlarına zidd olduğunu deyib.O, tərəfləri bölgədə iki dövlətli həll vizyonuna zərər verəcək və gərginliyi artıracaq əlavə hərəkətlərdən çəkinməyə çağırıb.

Prays İsrailin qeyri-qanuni hərəkətlərinə qarşı konkret addım atılıb-atılmayacağı ilə bağlı suallardan yayınıb və İsrailin ABŞ-ın bölgədəki ən yaxın müttəfiqi olduğunu və iki ölkənin təhlükəsizliyi üçün yaxından işləməyə davam edəcəyini təkrarlayıb.

Qeyd edək ki, Benyamin Netanyahu əvvəlki gün işğal altındakı İordan çayının qərb sahilində əvvəllər qeyri-qanuni qurulan 9 yaşayış məntəqəsini qanuniləşdirəcəyini, həmçinin bölgədəki zorakılıqları əsas gətirərək yaşayış məntəqələrini genişləndirəcəyini açıqlamışdı.

Şəbnəm Lətifi

Telegramda izləyin