Qətər Türkiyədə zəlzələdən zərər çəkənlərə yardım aparan daha 3 təyyarə göndərib

Qətər zəlzələlərdən zərər çəkmiş bölgələrdə yaraları sağaltmaq üçün Türkiyəyə daha 3 təyyarə göndərib.

Sonxeber.az xəbər verir ki, Qətərdəki xeyriyyəçilərin Türkiyəyə göndərdiyi son yardımla bağlı məlumat Türkiyənin Dohadakı səfirliyinin Twitter hesabında paylaşılıb.

"Zəlzələ bölgəsinin təcili ehtiyacı çərçivəsində Qətərdəki xeyirxah qardaşlarımızın bağışladığı 90 səyyar tualet, 25 generator və Qətər Silahlı Qüvvələrinə aid 3 fərqli C-17 təyyarəsi Adana/İncirlik Hava Bazasına yola düşəcək. Qətərin bu çətin zamanda həmrəyliyini heç vaxt unutmayacağıq",- deyə bildirilib.

Qeyd edək ki, Qətər zəlzələnin ilk günündən yaratdığı hava körpüsü ilə Türkiyə və Suriyaya müxtəlif yardımlar göndərmişdi.

Qətər Xarici İşlər Nazirliyinin sözçüsü Məcid əl-Ənsari fevralın 17-də verdiyi açıqlamada ölkəsinin Türkiyə və Suriyada zəlzələdən zərər çəkmiş şəxslərə verdiyi ərzaq, sağlamlıq və digər humanitar yardımların 253 milyon riala (70 milyon dollar) çatdığını bildirib.

Türkiyəyə axtarış-xilasetmə qrupu göndərən Qətər digər ölkələrdən də Türkiyəyə yardım çatdırıb.

Şəbnəm Lətifi

Telegramda izləyin