Cənubi Koreya və ABŞ təlimləri davam etdirəcək

Cənubi Koreya və ABŞ Şimali Koreyanın təhdidlərinə baxmayaraq "Azadlıq Qalxanı" adlı illik hərbi təlimlərini planlaşdırıldığı kimi davam etdirəcək.

Sonxeber.az xəbər verir ki, ABŞ və Cənubi Koreya ordusu sözçülərinin birgə keçirdiyi mətbuat konfransında 13-23 mart tarixlərində keçiriləcək hərbi təlimin müdafiə sahəsində əməkdaşlığın yaxşılaşdırılması məqsədi daşıdığı bildirilib.

Qeyd olunub ki, "Azadlıq Qalxanı" təlimində Şimali Koreyanın "aqressiv" hərəkətləri və son münaqişələrdən çıxardığı dərslər diqqət mərkəzində olacaq.

ABŞ ordusunun sözçüsü polkovnik İsaak L. Taylor isə təlimdə əməliyyat imkanlarını artırmaq üçün "Döyüşçü Qalxanı FTX" adlı bir sıra geniş miqyaslı ortaq səhra təlimləri təşkil edəcəklərini bildirib

Şimali Koreyanın keçən il keçirdiyi raket sınaqları və Cənubi Koreya ilə ABŞ-ın birgə hərbi təlimi bölgədəki gərginliyi bir daha artırmışdı.

Şərqə və qərbə müxtəlif tipli və diapazonlu 90-dan çox raket buraxan Pxenyan administrasiyası 2022-ci ilin noyabrında cəmi bir gündə 23 raket atıb.

Pxenyan da 2023-cü ilin ilk saatlarında ballistik raket sınağı keçirib.

Şimali Koreyanın son həftələrdə raket sınaqlarını artırmasına cavab olaraq Cənubi Koreya ABŞ-la birlikdə hava təlimləri keçirdiklərini bildirdi.

Şimali Koreya fevralın 24-də ABŞ-ın Koreya yarımadasında düşmənçilik fəaliyyətini davam etdirməsini müharibə elanı hesab edəcəyini açıqlayıb.

Telegramda izləyin