Pakistanda terror aktı nəticəsində 4 polis həlak olub

Pakistanın Hayber Paxtunxva əyalətində silahlıların polis məntəqəsinə və ora dəstək üçün gələn təhlükəsizlik işçilərinə hücumu nəticəsində 4 polis həyatını itirib, 6-sı yaralanıb.

Sonxeber.az xəbər verir ki, silahlılar gecə saatlarında Lakki Marvat rayonunda Səddar Polis İdarəsinə hücum ediblər.

Hücum xəbərindən sonra kömək üçün bölgəyə gələn polis maşını bombalı hücumun hədəfinə çevrilib.

Partlayışda 4 polis ölüb, 6 polis də yaralanıb.

Baş nazir Şahbaz Şərif Twitter hesabından verdiyi açıqlamada polisin terrora qarşı göstərdiyi fədakarlıqların unudulmayacağını bildirib.

Hələlik heç kim hücuma görə məsuliyyəti üzərinə götürməyib.

Son aylar Pakistanda, xüsusən də Hayber Paxtunxva və Bəlucistan əyalətlərində terror hücumları artıb.

İslamabad bildirir ki, bu hücumlar Əfqanıstanda yerləşən Pakistan Talibanı (TTP) tərəfindən planlaşdırılıb. Əfqanıstan bu iddiaları rədd edir.

Yanvarın 30-da Pakistanın Peşəvər şəhərində günorta namazı zamanı məscidə hücum nəticəsində əksəriyyəti polis olmaqla 102 nəfər həlak olub.

Telegramda izləyin